लुँ काण्डं माओवादी दुने आन्तरिक कचवं !
येँ (नेपालभाषा टाइम्स)÷सछि किलो लुँ ज्वंगु घटना शुरु जुइवं थुकी एमाले नेतातय् ल्हाः दु धकाः चर्चा जूगु खःसां आः वयाः धाःसा थुकी माओवादी नेतातय्गु हे ल्हाः दुुगु खः लाकि धइगु चर्चा शुरु जूगु दु । खास यानाः आइतवाः सुथय् राजस्व अनुसन्धान विभागं दावा छिरिङ नांयाम्ह छम्ह मनूयात ज्वनेवं माओवादी दुने तःधंगु तरंग पिहां वःगु खः ।
नेपाः व बेल्जियमया नागरिकता दुम्ह दावा छिरिङ व माओवादी नेता वर्षमान पुन (लिसें पुलांम्ह सभामुख ओनसरी घर्ती) नापं च्वनाच्वंगु किपा समेत सार्वजनिक जुइवं थुकिं माओवादी दुने तरंग पैदा याना बिउगु खः ।
माओवादी दुने थ्व घटनायात थीथी कथं स्वयेगु याना हःगु खँ सूत्रं धाःगु दु । थ्वहे खँयात कयाः म्हिगः च्वंगु माओवादी पदाधिकारी बैठकय् विवादय् लाःम्ह नेता पुनं दावाया नां कयाः थःत पार्टी दुने च्वंपिंसं समेत बदनाम यायेत स्वयाच्वंगु धकाः द्वपं बियादीगु खः । उकिं थुकियात कयाः समिति हे दयेकाः छानबिन यायेमाःगु माग समेत वय्कलं यानादीगु खः ।
थ्व स्वयां न्ह्यः एअरपोर्टय् च्वंगु ९ किलो लुँ त्वःतकेगु लागिं चिनियाँ–तय्सं पुलांम्ह सभामुख कृष्णबहादुर महरा व वय्कःया कायया ल्हाः दु धकाः चर्चा पिहां वःगु खः । आः हानं १०० किलो लुँ प्रकरणय् ज्वंम्ह मनूया स्वापू वर्षमान पुन व पुलांम्ह उपराष्ट्रपति नन्दबहादुर पुनलिसे समेत दु धकाः चर्चा पिहां वःगु दु । थ्वहे खँयात कयाः छखे विपक्षी नेकपा (एमालें) संसद हे न्ह्याके बी मखु धकाः हंगामा शुरु यायेधुंकूगु दुसा मेखे थुकिं यानाः माओवादी केन्द्र दुने आन्तरिक ल्वापु समेत पिकाइगु संकेत खने दया वःगु दु ।
विज्ञ सूत्रतय्सं लुँ काण्डय् माओवादी नेतातय्गु थ्व कनेक्सनया खँ पार्टीया आन्तरिक राजनीतिलिसे स्वाःगु खँ धया हःगु दु । माओवादी दुने आः पार्टी अध्यक्ष पुष्पकमल दाहाल धुंकाःया निम्हम्ह नेता सु जुइ धइगु चर्चा शुरु जुइधुंकूगु दु । उकी वर्तमान गृहमन्त्री नारायणकाजी श्रेष्ठ लिसें कृष्णबहादुर महरा, जनार्दन शर्मा, वर्षमान पुन प्रवल दावेदारत खः । लुँ काण्डया घटनात थुकियात समेत ध्यानय् तयाः घटित जुयाच्वंगु दावी सूत्रं याःगु दु ।
LEAVE YOUR COMMENTS