संसद विघटन लिपा सुवास नेम्बाङ गन बेपत्ता ?

येँ (नेपालभाषा टाइम्स) – प्रधानमन्त्री केपी ओलीं संसद विघटन याःगु घटना लिपा कानुनी पृष्ठभूमि समेत दुम्ह पुलांम्ह सभामुख लिसें नेकपाया उपनेता सुवास नेम्बाङ बेपत्ता जूगु दु । संसद विघटन बारे वय्कःया प्रतिक्रिया कायेत सञ्चारकर्मीतय्सं गुलि कुतः यातं नं वय्कः धाःसा सम्पर्कय् वयाच्वंगु मदु ।

खतुं थ्व इलय् प्रधानमन्त्री ओलीं याःगु संसद विघटनया पक्षय् न्ववायेगु लागिं आः सुं छम्ह हे कानून व्यवसायीत न्ह्यःने दं वःगु मदुनि । विघटनया विपक्षय् कल्याण श्रेष्ठ, सुशीला कार्की थेंज्याःपिं पुलांपिं प्रधानन्यायाधीश लगायत डा. भिमार्जुन आचार्य, डा. पूर्ण शाक्य, शम्भु थापा, डा. युवराज संग्रौला, टिकाराम भट्टराई, मुक्ति प्रधान आदि थेंज्याःपिं कानूनविज्ञतय्सं न्ववायेधुंकूसां विघटनया पक्षय् आः तक सुं छम्ह हे कानून व्यवसायीं न्ववाःगु मदुनि ।

थ्व स्वयां न्ह्यः गिरिजाप्रसाद कोइराला, मनमोहन अधिकारी, शेरबहादुर देउवा आदिपिंसं संसद विघटनया प्रस्ताव छ्वःबलय् उकिया पक्ष व विपक्ष निगुलिं खेमाया कानून व्यवसायीतय्सं खुल्ला रुपं थःथःगु बिचाः तयेगु ज्या याःगु खः । तर थुपालय् धाःसा विघटनया पक्षय् सुं छम्ह हे कानून व्यवसायी न्ह्यःने वःगु मदुनि । संवैधानिक अदालतय् थुकिया बारे थनिंनिसें सुनुवाई शुरु जुइगु खँ धाःगु दु। तर विघटनया पक्षय् सु सु वकिलं वहस याइ धइगु खँ धाःसा म्हिगः तक नं स्पष्ट जूगु मदुनि ।

न्हापा कोइराला व अधिकारीपिंसं संसद विघटनया प्रस्ताव तःबलय् पार्टीया लाइन कथं दकलय् न्ह्यःने च्वनाः खँ तः वःपिं मध्ये सुवास नेम्बाब छम्ह खः । तर थुपालय् वय्कः ‘बेपत्ता’ जुयादीगु घटनायात मनूतय्सं आश्चर्य कथं कयाहःगु दु। वय्कः सार्वजनिक रुपं पिलू मवःगुया अर्थ प्रधानमन्त्रीया थ्व निर्णयप्रति वय्कः सहमत मदुगु खः लाकि धकाः थुइका हःगु दु । गुलिखे सञ्चार माध्यमतय्सं नेम्बाब अध्यक्ष जुयाच्वंगु संविधानसभां संविधान च्वयाच्वंगु इलय् उकी प्रधानमन्त्रीपाखें संसद भंग याये दइगु अधिकार लिकायेमाः धकाः दकलय् न्ह्यःने च्वनाः वहस याःम्ह हे नेम्बाङ जूगु कारणं आः वय्कः छाय् सुम्क धकाः न्ह्यसः नं तयाहःगु दु ।