अन्तर्राष्ट्रिय मातृभाषा पत्रकारिता सम्मेलन जुइगु

येँ (नेपालभाषा टाइम्स) – वइगु साउनया स्वंगूगु वाःपाखे ‘स्वक्वःगु अन्तर्राष्ट्रिय आदिवासी मातृभाषा पत्रकारिता सम्मेलन’या ग्वसाः ग्वइगु जूगु दु ।

नेपाल आदिवासी जनजाति पत्रकार महासंघ (फोनिज) व नेवाः पत्रकार राष्ट्रिय दबूया मंकाः ग्वसालय् वइगु साउन २४ निसें २७ तक प्यन्हुयंकं मातृभाषा पत्रकारिता सम्मेलन जुइगु छगू पत्रकार सम्मेलन यासें जानकारी बिउगु दु ।

संयुक्त राष्ट्रसंघं सन् २०२२–२०३२ यात ‘आदिवासी भाषायो अन्तर्राष्ट्रिय दशक’या रुपय् घोषणा यानाः विश्वन्यंकंया आदिवासी जनजातिया भाय्या संरक्षण, प्रवद्र्धन व पुनर्जीवनया निंतिं अभियान न्ह्याकाच्वंगु सन्दर्भय्, विश्व आदिवासी दिवस व फोनिजया २७ क्वःगु स्थापना दिवसया लसताय् लाकाः सम्मेलन यायेत्यनागु फोनिजया अध्यक्ष लक्की चौधरीं जानकारी बियादिल ।

सम्मेलनया लिपांगु दिं मातृभाषा पत्रकारिताया संरक्षण, संवद्र्धन, प्रवद्र्धन व संस्थागत विकासया निंतिं आवश्यक नीतिगत सुधार, भाषिक अधिकारया सुनिश्चितता, आदिवासी संचारमाध्यमया सुदृढीकरण व पत्रकारतय् पेशागत हक व सुरक्षाया सम्बन्धी मंकाः प्रतिवद्धता दुथ्याकाः ‘येँ घोषणापत्र’ जारी यायेगु नं अध्यक्ष चौधरीं कनादिल ।

फोनिजया महासचिव समिर बलामीं नेपाःलिसें विश्वन्यंकंया आदिवासी जनजाति मातृभाषाया पत्रकारतय् दथुइ अनुभव कालबिल, अन्तर्राष्ट्रिय सहकार्य, साझेदरी व मंकाः अभियान निर्माण यायेत सम्मेलनं महत्वपूर्ण अवसर बीगु विश्वास प्वंकादिल ।

सम्मेलनय् २७ गू देय्या ख्वीम्ह विज्ञलिसें अन्तर्राष्ट्रिय मातृभाषी पत्रकार, फोनिजया देय्न्यंकंया शाखापाखें ३०० व पत्रकार दबूया पीम्ह स्वयां अप्वः प्रतिनिधि, जातीय पत्रकारतय् संगठनपाखें सछि यानाः न्यासः स्वयां अप्वःया सहभागिता दइगु पत्रकार सम्मेलनय् जानकारी बिउगु दु ।