इन्डोनेसियाय् भुखाय् लिपा सुनामी

शुक्रवाः इन्डोनेसियाया तटीय शहरय् ब्वःगु तःभुखाय् व शक्तिशाली सुनामीइ लानाः प्यसलं मल्याक मनूत सीगु दु । ७.५ म्याग्निच्यूडया भुखाय् लिपा स्वंगू मिटर तक तजाः जुइगु सुनामीया छाल वःगु खः । थ्व छाल सुलावेसी टापु जुयाः पालु शहर तक वःगु खँ धाःगु दु । सामाजिक सञ्जालय् तयातःगु भिडियाय् सुनामी लिपा मनूत चिच्याय् दनाः बिसिउँ वनाच्वंगु खनेदुगु खः ।

सुलावेसीया मध्य भागय्१० किलोमिटर क्वं स्थानीय ई कथं खुताः ई जुइत्यंबलय् भुखाय् ब्वःगु खँ अमेरिकी भौगर्भिक सर्वेक्षण निकाय (युएसजीएसं) धाःगु दु । शक्तिशाली भुखाय् लिपा शनिवाः तकं तःक्वः लिभुखाय् ब्वयाच्वंगु खँ धाःगु दु ।

भुखाचं अस्पताल, होटल व पसः यानाः द्वलंद्वः संरचना दुनाःगु खँ धाःगु दु । उद्धार ज्याय् नं मतया आपूर्ति बन्द जूगुलिं लिच्वः लानाच्वंगु खँ धाःगु दु । अथेहे चलः वनाः पालु शहर वनेगु लँपु नं बन्द जुयाच्वंगु दु । इन्डोनेसियाय् वंगु महिनाय् जक भुखाय् ब्वःगु खः । वंगु अगस्ट ५ य् लोम्बोक टापुइ लगातार ब्वःगु भुखाचं ४६० म्ह मनूतय् ज्यान वंगु खः ।