‘क्यानाडा अमरिका न्ह्यःने झुके जुइमखु’

अमेरिकां थःपिंथाय् दुहां वइगु विदेशी सामानय् कर अप्वयेकाः सुरु याःगु व्यापार युद्धविरुद्ध क्यानाडां नं अमेरिकी सामानय् कर अप्वयेकाः लिसः बिउगु दु । थ्व झ्वलय् क्यानाडाया विदेशमन्त्री क्रिष्टिया फ्रीलन्डं अमेरिकां स्टिल व अल्मुनियमं अप्वयेकूगु करया न्ह्यःने क्यानाडा झुके जुइमखु धाःगु दु ।

अमेरिकां दकलय् अप्वः क्यानाडां हे स्टिल व अल्मुनियमं निर्यात याना वयाच्वंगु खः । अमेरिकां कर अप्वयेकेवं क्यानाडा सरकारं थःथाय्या स्टिल व अल्मुनियम उद्योगयात ग्वाहालि यायेगु निंतिं डेढ अर्ब अमेरिकी डलर बराबरया सहायता कार्यक्रम घोषणा यायेधुंकूगु दु । अले थ्व कर रकम अमेरिकां थःथाय् आयात जुइगु सामानय् कर अप्वयेकाः हे परिपूर्ति याइगु जुइ ।

क्यानाडां वइगु जुलाई १ निसें १६.६ अर्ब क्यानेडियन डलर बराबरया अमेरिकी सामानय् कर अप्वयेकेत्यंगु दु । विदेशमन्त्री क्रिष्टियां अमेरिकां क्यानाडाय न्ह्यःन मेगु छुं हे विकल्प मबिउगुलिं थज्याःगु कर हे अप्वयेकाः लिसः बीमाःगु खँ धयादीगु दु ।

क्यानाडां लगे याःगु कर स्टिल व आल्मुनियमं दयेकातःगु अमेरिकी उत्पादनय् लक्षित जुइ । अथेहे धौ,क्याचअप व राजनीतिक अखडा कथं नालातःगु विस्कन्सिन, पेन्सिल्भानिया व फ्लोरिडाय् उत्पादन जुइगु सुन्तलाया जूसं नं क्यानाडां कर अप्वयेकूगु दु