आप्रवासी समस्याय् पुटिनया मुख्य ल्हाः दु ः पोल्याण्ड

एजेन्सी- पोल्याण्डया प्रधानमन्त्री माट्युस मोराभियस्कीं बेलारुसलिसे स्वानाच्वंगु सिमानाय् खनेदयाच्वंगु आप्रवासी समस्याय् रुसया राष्ट्रपति भ्लादिमिर पुटिनया ल्हाः दुगु द्वपं बिउगु दु । प्रधानमन्त्री माट्युस मोराभियस्कीं बेलारुसया राष्ट्रपति एलेक्जेन्डर लुकाशेन्कां आप्रवासी समस्याया सिर्जना याःगु खःसा थुकिया मुख्य योजनाकार मस्कोय् दु धाःगु खः ।

मंगलवाः सिमानाय् च्वपिं सैनिकतय्त नापलाये धुंकाः पोल्याण्डया प्रधानमन्त्रीं संसद्या आपत्कालीन सत्रय् न्ववासें थ्व समस्याया सञ्चालन लुकाशेन्कां यानाच्वंगु व थुकिया मास्टरमाइन्ड मस्कोय् च्वनाच्वंम्ह रुसया राष्ट्रपति पुटिन खः धाःगु खः । प्रधानमन्त्री माट्युस मोराभियस्कीं ३० दँ लिपा पोल्याण्डया सीमा सुरक्षाय् निर्दयी हमला जूगु नं धाःगु खः ।

पोल्याण्ड व बेलारुसया पूर्वी सिमानां थ्यंमथ्यं निद्वः आप्रवासी पोल्याण्डय् दुहां वयेत स्वयाच्वंगु दु । आप्रवासीत अप्वः थें मध्यपूर्व, अफगानिस्तान व अफ्रिाकां वयाच्वंपि खः । सामाजिक सञ्जालय् तयातःगु भिडियोय् सलंसः मनूत पोल्याण्डय् दुहां वयेत स्वयाच्वंगु खनेदु । मनूत तार बार चानाः, सिमा क्वःथलाः व सामूहिक बल छ्यलाः जर्बजस्ती दुहां वयेत स्वयाच्वंगु दुसा पोल्याण्डया सेनां उमित पनाच्वंगु दु ।

बेलारुसं पोल्याण्डयात ब्वला सायेत आप्रवासीतय्त ल्ह्वंगु द्वपं युरोपेली संघं बिउगु दु । थःपिंत प्रतिबन्ध तयातःगुया ब्वला सायेत बेलारुसं आप्रवासीत छ्वयाहःगु द्वपं युरोपेली संघं बिउगु खः । बेलारुसया राष्ट्रपति एलेक्जेन्डर लुकाशेन्कां धाःसा थुगु द्वपयात अस्वीकार याःगु द । तर अवस्था बांमलानावन धाःसा थःपिंसं रुसयाके ग्वाहालि कायेगु ख्याच्वः बिउगु दु ।
पोल्याण्ड व बेलारुसया सिमानाय् थानाच्वपिं मनूत पाल ग्वयाः अन हे च्वनाच्वंगु दु । नर्वेली शरणार्थी परिषदया महासचिव यान एगल्याण्डं आप्रवासीतय्त जुयाच्वंगु व्यवहारया निन्दा याःगु दु ।

सम्बन्धित बुखँ

LEAVE YOUR COMMENTS