सान फ्रान्सिस्कोय् ई–चुरोटय् प्रतिबन्ध

अमेरिकाया सान फ्रान्सिस्कोय् इलेक्टोनिक चुरोट (ई–चुरोट)य् प्रतिबन्ध तइगु जूगु दु । ई चुरोटय् प्रतिबन्ध तःगु सान फ्रान्सिस्को विश्वया हे न्हापांगु शहर नं जूगु दु । सान फ्रान्सिस्कोया अधिकारीतय्सं मंगलवाः जूगु मतदानय् पसलय् व अनलाइन पाखें ई चुरोट मीगुलिइ प्रतिबन्ध तयेगु पक्षय् मत बिउगु खः ।

अमेरिकाया दकलय् लोकंह्वाःगु ई–चुरोट ब्रान्ड जूल ल्याब्सया उत्पादन क्यालिफोर्नियाय् जुइ । थ्व कम्पनीं प्रतिबन्धयात कयाः प्रतिक्रिया बिइगु झ्वलय् मनूत हाकनं परम्परागत चुरोटय् हे लिहां वयेत बाध्य याःगु खँ धाःगु दु ।सान फ्रान्सिस्कोया मेयर लन्डन ब्रीडयात थ्व कानुनय् हस्ताक्षर यायेगु निंतिं झिन्हुया ई दनि ।

तर वय्कलं थ्व कानुनय् हस्ताक्षर यायेगु संकेत बियादीधुंकूगु दु । वय्कलं हस्ताक्षर याःगु न्हय्ला लिपा कानुन कार्यान्वयनय् वइ । मेखे अमेरिकाया ईचुरोट उत्पादन कम्पनीतय्सं थ्व प्रतिबन्ध विरुद्ध कानुनी उपचार मालेगु खँ धायेधुंकूगु दु ।

ई–चुरोट विरुद्धया अभियानकर्तातय्सं भापिङ नं धाइगु थज्याःगु चुरोटं ल्याय्म्हतय्त परम्परागत चुरोट पाखे हे आकर्षित यायेत प्रोत्साहन बियाच्वंगु खँ धयाच्वंगु दु । उमिसं ई चुरोटं सुगन्धित वस्तु छ्यलाः ल्याय्म्हतय्त सिइक चायेकं हे निशाना दयेकाच्वंगु धासें थुकिं लाइगु वैज्ञानिक प्रभावबारे अनुसन्धान यायेमाःगु खँ नं धाःगु दु ।