म्यानचेस्टर इएफएल कपं पिने

इएफएल (कारबाओ कप) अन्तर्गत जूगु कासाय् पेनाल्टी सुटआउटय् डर्बी काउन्टी नाप ८—७ बुगू म्यानचेष्टर युनाइटेड स्वंगूगु चरणं हे पिने लाःवंगु दु । म्याचेष्टर युनाइटेडं कासाया स्वंगूगु मिनेटय् हुआन माटाया गोलं अग्रता काःगु खः । निगूगु हाफया ५९ मिनेटय् विल्सनं डर्बीया निंतिं गोल यानाः कासा बराबरीइ हयाबिल ।

थ्व सिजनय् न्हापांगु कासा म्हिताच्वंम्ह युनाइटेडया गोलकिपर सर्जियो रोमेराें ६७ औं मिनेटय् तप्यंक ह्याउँगु कार्ड नयेव युनाइटेड झीम्ह कासामिइ सीमित जूगु खः । कासाया ८५ औं मिनेटय् मारिओट्टं गोल यानाः डर्बीयात अग्रता बियाबिल, तर इन्जुरी इलय् फेलाइनीं युनाइटेडया निंतिं बराबरी गोल याःगु खः ।

थ्व लिपा पेनाल्टी सुट आउटय् वंगु कासाय् डर्बीया गोलकिपर स्कट कारसनं फिल जोन्सया प्रहार पनाबिइवं म्यानचेस्टय् स्वंगूगु चरणं पिहां वनेमाल । थुगु हे धेंधेंबल्लाःया मेगु कासाय् म्यानचेस्टर सिटीं अक्सफोर्ड युनाइटेडयात ३–० गोलं बुकल । सिटीं न्हापांगु हाफय् छगू व निगूगु हाफय् निगू गोल याःगु खः ।

कासाया ३६ औं मिनेटय् गाब्रिएल जिससया गोलं सिटीं अग्रता काःगु खः । निगूगु हाफया ७८ औं मिनेटय् रियाद महरेज व इन्जुरी टाइमय् १८ दँ दुम्ह फिल फोडिनं गोल याःगु खः । सिटीया १८ दँ दुम्ह फिल फोडिनोयात बार्सिलोनाया लिजेण्ड कासामि आन्दे्र इनिएस्टानाप तुलना याःगु दु ।इएफएल अन्तर्गत हे जूगु मेगु कासाय् फुलह्यामं मिलवानयात ३–१ गोलं व क्रिस्टल प्यालेसं वेस्ट ब्रोमयात ३—० गोलं बुकूगु दु ।