मेसीयात च्याक्वःखुसी बालन डी’ओर

एजेन्सी- अर्जेन्टिनाया कासामि लियोनल मेसीं च्याक्वखुसी बालोन डी’ओरया उपाधि त्याकूगु दु । पेरिसय् जूगु छगू ज्याझ्वलय् मेसीयात थ्व उपाधि बिउगु खः । मेसीं सन् २००९ निसे २०१२ तक, सन् २०१५, सन् २०१९ व सन् २०२१ य् थ्व उपाधि त्याकेधुंकूगु दु ।

अर्जेन्टिनां कतारय् जूगु फिफा विश्वकप त्याकेगु निंतिं मेसी महत्वपूर्ण भूमिका म्हितूगु खः । उपाधि लःल्हाना कायेगु झ्वलय् इन्टर मियामीया कासामि मेसीं हाकनं छक्वः अवार्ड त्याकेखनाः थः तसकं लय्ताःगु धाःगु खः । मेसीं नर्वेया हालान्ड व फ्रान्सया एमबाप्पेयात लिउने लाकाः उपाधि त्याकूगु खः । हालान्ड निगूगु व एमबाप्पे स्वंगूगु थासय् लाःगु खः । मेसी धुंकाः क्रिष्टियानो रोनाल्डाें दकलय् अप्वः थ्व उपाधि त्याकूगु दु । पोर्चुगलया कासामि रोनाल्डों न्याक्व थ्व उपाधि त्याकूगु दु । अल नासरया कासामि रोनाल्डो थुगुसी धाःसा मनोनयन तकं मलाःगु खः ।

मिसापाखेया बालोन डी’ओर उपाधि स्पेनया कासामि अइतामा बोनमाटीं त्याकूगु दु । बार्सिलोनाया कासामि बोनमाटीया कप्तानीइ स्पेनं फिफा मिसा विश्वकपया उपाधि त्याकूगु खः । बोनमाटीं न्हापांखुसी थ्व अवार्ड त्याकूगु खः । अथेहे इग्ल्याण्डया कासामि जुड बेलिङघमयात उत्कृष्ट युवा कासामिया अवार्ड बिउगु दु ।

बेलिङघमं रियल म्याड्रिड म्हितावयाच्वंगु दु । उत्कृष्ट गोलकिपरया उपाधि अर्जेन्टिनाया इमिलियानो मार्टिनेजं त्याकूगु दु । मिजं पाखेया क्लब अफ द इयर म्यानचेस्टर सिटी जूगुु दुसा मिसापाखे क्लब अफ द इयर बार्सिलोना जूगु दु ।