युभेन्ट्सया अपराजित यात्रा क्वचाल, बार्सा व लिभरपुल त्यात

इटालियन सिरी ए अन्तर्गत जूगु कासाय् युभेन्टसं थ्व सिजनय् न्हापांखुसी पराजय फःगु दु । च्याम्पियन्स लिगय् ह्याट्रिक याःम्ह स्टार कासामि क्रिष्टियानो रोनाल्डो मम्हितूगु कासाय् जेनोआं युभेन्टसया अपराजित यात्रा दिकाबिउगु खः । थःगु घरेलु मैदानय् जूगु कासाय् जेनोआ युभेन्टसयात २–० गोलं स्तब्ध याःगु खः ।

जेनोआया निंतिं न्हापागुं गोल कासाया निगूगु हाफया ७२ औ मिनेटय् युभेन्टसया हे पूर्वकासामि स्टेफानो स्टुराराें यात । स्टेफानों गोल याःगु ९ मिनेट लिपा हे गोरानो पानदेवं मेगु गोल याना युभेन्टसयात बुकूगु खः । युभेन्टसया निति पाउलो डिबालां याःगु गोलं धाःसा भिएआरं अफसाइड क्यनाबिल । युभेन्टस ‘सिरी ए’य् सन् २०१८ या अप्रिल २२ य् पराजित जुसां निसें छगू नं कासा बूगु मदुनि ।

युभेन्टस आः नं निगूगु थासय् लानाच्वंगु नापोली सिबें १८ अकं न्ह्यःने दु । मेखे ला लिगाय् कप्तान लियोनल मेसीया ह्याट्रिकया ग्वाहालिं बार्सिलोनो रियल बेटिसयात ४—१ गोलं बुकल । बार्सिलोनाया निंतिं मेगु छगू गोल लुइस स्वारेजं याःगु खः । कासाया न्हापांगु हाफय् मेसीया निगू गोलं बार्सायात २–० या अग्रता बिल ।

१८ औं मिनेटय् २० यार्ड तापाक प्रहार याःगु फ्रिकिक गोल जूगु खः । न्हापांगु हाफया इन्जुरी ईया ४७ औं मिनेटय् मेसीं स्वारेजया ब्याकहिल पासय् निगूगु गोल यात । निगूगु हाफय् बार्सिलोनां थप निगू गोल यात । स्वारेजं ६३ आंै मिनेटय् याकःचां बल यंका गोल यात । ८२ औं मिनेटय् बेटिसया लोरेन मोरनं गोल यानाः गोल अन्तर चिब्या याःगु खःसां थ्व गोल जूगु स्वंगू मिनेट लिपा हे मेसीं ह्याट्रिक पूवंकाः तब्याःगु गोल अन्तरं विजय चूलाकाबिल ।

ला लिगाय् मेसीया थ्व ३३ औं ह्याट्रिक खः । इंग्लिस प्रिमियर लिगय् लिभरपुलं फुलह्यामयात २—१ गोलं बुकल । लिभरपुलं न्हापागु हाफय् छगू व लिपांगु हाफ छगू गोल याःगु खः । फुलह्यामं निगूगु हाफ छगू जक गोल यात । साडियो मानें कासाया २६ औं मिनेटय् गोल यानाः लिभरपुलयात अग्रता बिउगु खः । फुलह्यामया रायन बाबेलं ७४ औं मिनेटय् गोल यानाः कासा बराबरीइ हल ।

तर ८१ औं मिनेटय् चूलाःगु पेनाल्टीइ गोल यानाः लिभरपुलं विजय चूलाकल । लिभरपुलया निंतिं जेम्स मिलनेर पेनाल्टीइ विजयी गोल याःगु खः । प्रिमियर लिगया हे मेगु कासाय् चेल्सी एर्र्भटनलिसे २–० गोलं पराजित जुल । एर्भटनया निंतिं कासाया ४९ औ मिनेटय् रिचालिसन व ७२ मिनेटय् सिगुडर्सनं गोल याःगु खः । थ्व पराजय लिपा चेल्सी शीर्ष प्यंगूगु टिम च्वनाच्वनेत नं थाकुइगु खनेदुगु दु ।

सम्बन्धित बुखँ

LEAVE YOUR COMMENTS