मेक्सिकोया घरेलु लिगय् जूगु ल्वापुइ निम्ह सित, २२ म्ह घाःपाः

एजेन्सी- मेक्सिकोया घरेलु फुटबल लिगय् निगू क्लबया समर्थक दुथइ जूगु हिंसात्मक ल्वापुइ लानाः निम्ह मनू सीगु दुसा २२ म्ह घाःपा जूगु अन्तर्राष्ट्रिय सञ्चार माध्यमतय्सं धाःगु दु । मेगु छगू अनौपचारिक स्रोतकथं ल्वापुइ १७ म्ह मनू सीगु दुसा ४० म्हं मल्याक घाःपाः जूगु दु ।

सामाजिक सञ्जालय् खनेदु किपा व भिडियोय् मनूत दायाः दायाः ल्वानाच्वंगु, मनूतय्त बँय् लुया यंकाच्वंगु, प्यंकाच्वंगु खनेदु । घटनाया किपा व भिडियो सार्वजनिक याःगु धासें स्थानीय पत्रकारतय्गु आलोचना नं जूगु दु ।

मेक्सिकोया घरेलु फुटबल लिग एमएक्स अन्तर्गत क्वरेटारो व एटलास दथुइया कासाया झ्वलय् थ्व झडप जूगु खः । निगूगु हाफय् एटलासं घरेलु टोली क्वरेटारो विरुद्ध १–० या अग्रता कायेधुंकाः क्वरेटारोया समर्थकत ६२ औ मिनेटय् मैदानय् दुहां वयेवं ल्वापु शुरु जूगु खः । घटना लिपा कासा रद्द याःगु खः ।

घटनायात कयाः थीथी खँ पिहां वयाच्वंगु दुसां घटना खास छु कारण जुल धयागु खँ अझं स्पष्ट जूगु मदुनि । थुकियात कयाः अनुसन्धान जुयाच्वंगु दु ।