ने. सं. ११४४ कौलाथ्व चौथी -

अवैध छेँ–टहरां सतक विस्तारय् समस्या

यल – नेपाःया न्हापांगु १० लेनया सतकया रुपय् दुगु निर्माणाधिन कोटेश्वर–कलंकी सतक सिथय् दयेकातःगु अवैध छेँ–टहरा चिइके मफयाच्वंगुलिं निर्माणया ज्या अवरुद्ध जुयाच्वंगु दु । सहायक सतकय् दुहां वनेगु लँपुया रुपय् दुगु सेवा मार्गय् च्वंगु छेँ–टहरां ज्याय् पंग थनेगु ज्या जुयाच्वं काठमाडौं चक्रपथ सुधार योजनां न्ह्यथंगु दु ।

सातदोबाटो, थसि, ग्वार्को, बालकुमारि लगायतया थासय् सतक सिथय् आपालं अस्थायी छेँ–टहराया संरचना दुगु योजनाया इन्जिनियर निरञ्जन शर्मा अर्यालं कनादिल । अस्थायी रुपय् सिँया गोदाम, कवाडी लगायत पसः उगु थासय् तयातःगु दु । वडा ज्याकू व नगर विकास ज्याकुथिं ३१ मीटर मापदण्डया आधारय् चिं तःगु इलय् उगु संरचना थुनेत धाःगु खः ।

स्वदँ दयेधुंकाः नं सम्बन्धित मनूतय्सं उगु संरचना चिइकेगु, थुनेगु ज्या धाःसा यानाच्वंगु मदुनि । वय्कलं धयादिल, ‘संरचना चिइकाः सतक खाली यायेत तःक्वः तःक्वः सार्वजनिक सुचं तकं जारी यायेगु ज्या जुइधुंकूगु दु ।’चक्रपथ दुगु थासय् ३१ मिटर दुने हे छेँ–टहरा तकं दयेकातःगु दु । योजनां तःक्वः तःक्वः ताकेता याःसां नं छेँ–टहरा प्रयोग याना वयाच्वंपिंसं उकियात थुनेगु खँय् उलि चिउताः तया वयाच्वंगु मदु ।

वय्कलं धयादिल, ‘छेँ–टहरां यानाः ज्या यायेत हे समस्या जुयाचवंगु दु । थ्व सम्बन्धय् सरोकारवाला निकाययात नं जिमिसं जानकारी याकेधुंगु दु ।’सतक निर्माया झ्वलय् थीथीकथंया समस्या व पंगःया सामना यायेमालाच्वंगु इन्जिनियर अर्यालं धयादिल । सतकय् च्वंगु मत व टेलिफोनया लठ्ठा ल्ह्ययेगु, त्वनेगु लः व धःया पाइप ल्ह्ययेगु ज्याय् सम्बन्धित ज्याकूपाखें ढिलासुस्ती जुयाच्वंगु दु ।

सम्बन्धित ज्याकुथिं पाइप व लठ्ठा ल्ह्ययेत बजेटया अभाव जूगु धया वयाच्वंगु दु । वय्कलं धयादिल, ‘जिमिसं थःपिनिगुपाखें बजेट बिउसां इलय् ज्या जुयाच्वंगु मदु ।’
ज्या यायेगु जिम्मेवारी कयातःगु कम्पनी थःपिंसं हे उगु थाय् खाली याकेमाःगु नियम दु । सतक निर्माणया झ्वलय् साइड खाली यायेत ई कयाच्वंगु वय्कलं धयादिल । चिनिया सरकारया ग्वाहालिइ निर्माणाधिन कोटेश्वरनिसें कलंकीतकया १० दशमलव ४ किलोमीटर सतक लम्बाइ दु ।

सतक निर्मााया जिम्मेवारी संघाई निर्माण समूहनं कयातःगु दु । मुख्य प्यंगू व सहायक प्यंगू यानाः च्यागू लेन चिनिया कम्पनीं निर्माण यायेगु सम्झौता जूगु खः । निखेरं खगू मिटर ब्या सेवा मार्ग निर्माण यायेगु जिम्मेवारी सरकारया खः ।

मुख्य व सहायक मार्गया ज्या करिब लिपांगु चरणय् थ्यंसां सेवा मार्गया ज्या धाःसा अझ्र आपालं ल्यं दसनि । काटेश्वरनिसें झण्डै बालकुमारितक चक्रपथ दुने व पिने लाःगु निगुलिं सेवा मार्ग कालोपत्र यायेगु ज्या धाःसा सिधयेधुंकूगु दु । चक्रपथपिने ग्वार्कोनिसें सातदोबाटो एन्फा तक चक्रपथ दुने लाःगु मार्गया कालोपत्र यायेगु ज्या नं सिधयेधुंकूगु दु ।