पत्रकार आचारसंहिता अभिमुखीकरण ज्याझ्वः

येँ – प्रेस काउन्सिल नेपालया ग्वसालय् व नेवाः पत्रकार राष्ट्रिय दबूया संयोजनय् पत्रकार आचारसंहिचा अभिमुखीकरण सम्बन्धी छगू ज्याझ्वः जुल । प्रेस काउन्सिलया सभाकक्षय् जूगु ज्याझ्वः प्रेस काउन्सिलया कार्यवाहक अध्यक्ष किशोर श्रेष्ठया अध्यक्षताय् जूगु खः ।

ज्याझ्वलय् प्रेस काउन्सिलया दुजः शुभेच्छा विन्दुं लसकुस यासें ज्याझ्वःया आवश्यकता व पत्रकार आचारसंहिताया थीथी पक्षयात कयाः नुगःखँ तयादीगु खः । अथे हे प्रेस काउन्सिलया मुख्य अधिकृत झविन्द्र भुसालं पत्रकार आचारसंहिताया बारे विस्तृत रुपं जानकारी न्ह्यब्वयादीगु खः ।

उगु इलय् नेवाः पत्रकार दबूया नायः श्रीकृष्ण महर्जनं प्रेस काउन्सिल व पत्रकार दथुइ सम्बन्ध नापं पत्रकार आचारसंहिता सम्बन्धय् थःगु नुगःखँ तयादीगु खः । ज्याझ्वलय् दबूया मूछ्यांजे सुनील महर्जन, न्वकु नृपेन्द्रलाल श्रेष्ठ, दांभरिं सुरेन्द्रभक्त श्रेष्ठ, छ्यांजे केके मानन्धर लगायत केन्द्रीय दुजःनापं थीथी संचारमाध्यमय् आवद्ध संचारकःमिपिनिगु नं सहभागिता दुगु खः ।