दान्यहिरा सिरपाः लःल्हात
यल (नेपालभाषा टाइम्स)÷ नेपालभाषा एकेदमिया ग्वसालय् नेपालभाषा वाङ्गमय ख्यःया प्रतिष्ठित सिरपाःया कथं कयातःगु दान्यहिरा सिरपाः लःल्हाःगु दु । जनकवि दुर्गालाल श्रेष्ठ मूपाहाँ कथं झायादीगु बिहीवाः ज्याझ्वलय् सिरपाया दाता, बाखं च्वमि यज्ञरत्न धाख्वाःया बाखं मुना सफू “मिसा पासा” या पितब्वज्या नं जूगु खः ।
साहित्य, संगीत व विज्ञान प्रविधिया ख्यलय् ज्या यानाः ज्वःमदुगु योगदान बिया वयाच्वनादीपिं छम्ह छम्ह स्रष्टायात लःल्हाइगु दान्यहिरा सिरपा थुगुसिइ साहित्यख्यःपाखे आधुनिक कविताया ज्वःमदुम्ह स्रष्टा डा. योगेन्द्र प्रधानयात लःल्हाःगु खः । अथेहे संगीतख्यःया सिरपाः नांजाःम्ह संगीतकःमि, म्येहालामि जुजुकाजि रन्जितयात व विज्ञान प्रविधि ख्यःया सिरपाः जीवन कुमार श्रेष्ठयात लःल्हाःगु खः । थ्व सिरपाया दां म्हतिं न्यय्द्वःतकायागु खः ।
नेपालभाषा एकेडेमीया ग्वसालय् दँय्दसं बिया वयाच्वंगु थ्व सिरपाःया निंतिं थुगुसिइ निसें एकेडेमि अन्तर्गत छगू स्वतन्त्र समिति नीस्वनाः सिरपाः त्याकादीपिं ल्यःगु खःसा सिरपाःया निंतिं न्यय्गु लाख तकाया कोष नं दयेकूगु खः ।
ज्याझ्वलय् उगु समितिया कजि नेपालभाषा एकेडेमीया भाइस चान्सलर मल्ल के सुन्दरं लसकुस यासे एकेडेमीपाखें जुयाच्वंगु थीथी ज्याया नापनापं दान्यहिरा सिरपाया थीथी पक्षबारे खँ कनादिल ।
सिरपा ज्याझ्वलय् गायक जुजुकाजि रन्जित व संगीता शाक्यं थीथी म्ये नं न्यंकादीगु खः । थ्व सिरपा क्वछिनाया निंतिं नीस्वंगू स्वंगू समितिइ छसिकथं प्रा. नर्मदेश्वर प्रधान, मनराजा नकःमि व दिनेशराज भुजु कजि कथं च्वनादीगु खः । ज्याझ्वलय् प्रेमहिरा तुलाधर, मनराजा नकःमि व डा त्रिरत्न बज्राचार्यपिंसं सिरपाः कयादीपिनिगु परिचय न्ह्यब्वयादीगु खःसा एकेडेमीया दुजः राजेन्द्र कुमार महर्जन पुतां दसिपौ ब्वनाः न्यंकादीगु खः ।
एकेडेमीया दुजः महेन्द्र गोपाल कर्माचार्यं न्ह्याकादीगु उगु ज्याझ्वलय् सिरपा त्याकादीपिंसं नं नुगःखँ तयादीगु खःसा एकेडेमीया सदस्य सचिव डा. पुष्पराज राजकर्णिकारं सुभाय् देछायादीगु खः ।
LEAVE YOUR COMMENTS