नेपाःया सर्गः हानं छकः बदनाम, शोक विदा नं विवादय्
येँ (नेपालभाषा टाइम्स)- येँनं पोखरापाखे वनाच्वंगु यति एअरलाइन्सया विमान म्हिगः पोखराय् दुर्घटना जुयाः छक्वलं ६८ म्ह मनूया ज्यान वनेवं नेपाःया सर्गः हवाई उडानया लागिं सुरक्षित मजू धकाः हानं विश्व दबुली बय्बय् जूगु दु । उकिसनं पर्यटनया लागिं शहर पोखराय् थ्व दुर्घटना जूगु जुयाः हलिंन्यंकं थुकिया बारे छक्वलं चर्चा परिचर्चा नं शुरु जूगु दु ।
छक्वलं थुलिमछि यात्रु सीगु ल्याखं थ्व नेपाःया हे दकलय् तःधंगु आन्तरिक विमान दुर्घटना खः । नकतिनि खुले जूगु पोखरा अन्तर्राष्ट्रिय विमानस्थलय् ल्याण्ड यायेत्यंगु थ्व विमान दुर्घटना जूगुलिं थुकिं विमानस्थलया प्रविधिइ समेत न्ह्यसःचिं पिकायेफुगु खँ धाःगु दु ।
विमान दुर्घटनाया खास कारण सीमदुनि । विदेशी सञ्चार माध्यमतय्सं नेपाःया पहाडी लागाय् याकन याकनं मौसम हिलीगु जूगुलिं थन विमान दुर्घटना असामान्य घटना मखु धकाः च्वयाहःगु दु । म्हिगः दुर्घटना जूगु विमान नं ल्याण्ड यायेत अनुमति समेत कायेधुंकूगु जुयाः छु जुयाः दुर्घटना जुल धाये मफु धाःगु दु ।
दुर्घटना जूगु प्रकृति स्वयेबलय् विमान ल्याण्ड यायेत्यंगु इलय् हे छुं कथंया खराबी पिहां वःगु खः उकिया जानकारी पाइलटयात वयेधुंकूगु अनुमानयाःगु दु । आः विमान कुतुं वनीगु निश्चित जुल धइगु सीकाः पाइलटं वस्ती मदुगु थाय्पाखे विमान जोते यायेयंकूगु जुइमाः धाःगु दु । दुर्घटना लिपा सरकारं न्ह्याबलें थें छगू छानबिन समिति गठन यानाः दुर्घटनाया कारण सीकेगु खँ धाःगु दु ।
विदाया विवाद ः
म्हिगःजूगु विमान दुर्घटनाया शोक माने यायेत धकाः सरकारं थौं बिउगु सार्वजनिक बिदाया नं सामाजिक सञ्जालय् कडा आलोचना यानाहःगु दु । दुर्घटनाय् सीपिनि छेँजःपिंत सार्वजनिक विदा मखु जहाज दुर्घटनाया कारण सीकेमाःगु दु धासें सरकारं भावुकताया राजनीति याःगु द्वपं बियाहःगु दु ।
थ्व विदां यानाः सरकारी ज्याकूत बन्द जुयाः विमान दुर्घटनालिसे सम्बन्धित ज्या खँ यायेमाल धाःसा अःखतं समस्या जुइगु खँ धयाहःगु दु । नापं, गनं दुर्गम गामय् आः थुलि हे मनूया ज्यान वनी कथं गाडी दुर्घटना जुल धाःसा उकी विदा बी लाकि मबी धकाः नं न्ह्यसःतयाहःगु दु । अथे हे आः दुर्घटनाय् ग्वःम्ह तक मनू सित धाःसा विदा बीगु खः, व स्पष्ट याये मालधकाः नं माग यानाहःगु दु ।
LEAVE YOUR COMMENTS