चेस जक म्हितीगु चेस पार्क

येँ -येँ व यल स्वाइगु थापाथली ताँया क्वसं छगू न्हूगु पार्क दयेकूगु दु । थुकिया विशेषता छु धायेबलय् अन स्वः वन धाःसा मनूत पुचः पुचः मुनाः चेस म्हिताच्वंगु खनी । न्हिं ६–७ थ्वः ला खाली हे जुइ मखु । गबलें ला १०–१५ थ्वः हे चेस म्हिताच्वंगु दइ । चेस म्हितीपिनिगु लागिं धकाः हे वडा नं. ११ पाखें अन थ्व पार्क दयेका बिउगु खः, गुकिया नां खः चेस पार्क ।

पार्कय् दुहां वनेवं चेस बोर्डया द्यःने चेसया जुजु व किसिया निगः ततःग्वःगु गट्टा तयातःगु खने दइ । थौंकन्हय् अझं निर्माणाधीन अवस्थाय् लानाच्वंगु थ्व पार्क येँ महानगरपालिकां दयेका बिउगु खःसां उकी स्थानीय जनताया नं ग्वाहालि दुगु खँ वडा अध्यक्ष हिरालाल तण्डुकारं कनादिल । वय्कलं कनादी कथं थ्व पार्क ११ वडाय् लाःसां थन स्वनिगःया फुक्क हे थाय्या मनूत चेस म्हितः वः ।

चेसया राष्ट्रिय खेलाडीत नं थन म्हितः वयेगु याः । गबलें गबलें थन चेस टुर्नामेन्ट नं जुइगु याः । थन चेस म्हितः वइपिं कासामितय्सं छगू चेस क्लब नं दयेका तःगु दु । पार्क दुने वा वःसा दुने च्वनाः म्हितेत छखा खुल्ला छेँ नं दनेधुंकूगु दु । वडाध्यक्ष तण्डुकारया कथं चेसयात समर्पण यानाः दयेकातःगु थज्याःगु पार्क नेपालय् थ्वहे छगू जक जुइमाः ।

सम्बन्धित बुखँ

LEAVE YOUR COMMENTS