सैनिक महाविद्यालयय् विद्यार्थीं विद्यार्थी स्यायेगु कुतः
येँ – थः ब्वनाच्वनागु स्कुल बन्द याकेगु निंतिं चितवनया सैनिक महाविद्यालयया स्वम्ह विद्यार्थीतय्सं थः हे छम्ह पासायात दायाः स्यायेगु कुतः याःगु दु । चितवनया खैरहनी नगरपालिकाया पर्साय् च्वंगु महाविद्यालयया आवास गृहय् च्वनाच्वंम्ह, ९ कक्षाय् ब्वनीम्ह श्रीनव लामिछानेयात सुथय् ३ बजे पाखे ट्वाइलेट वनेत पिहां वःबलय् स्वम्ह पासापिं क्रिस थापा, रिवाज रेग्मी व अनिस श्रेष्ठं दायेगु जक मखु स्याये धकाः गःपः तकं तिउगु खः । तर उबलय् हे मेपिं पासापिंसं खनाः गार्डयात धयाबिउगुलिं व बचे जुल ।
स्कुलय् विद्यार्थीयात स्यायेगु कुतः जुलं नं महाविद्यालयं धाःसा वया अभिभावकपिंत खबर तकं मयाः । घाःपाः जूम्ह श्रीनवया मां सिर्जना लामिछानें महाविद्यालयं घटना सुचुकेगु निंतिं थःत जानकारी तकं मबिउगु व मेपिनि मस्तय् अभिभावकपिंसं धयाः जक थम्हं सिउगु खँ धाःगु दु । मचायात आः भरतपुरया हे मनकामना अस्पतालय् वासः याकातःगु दुसा वयात दांपिं विरुद्ध प्रहरीइ उजुरी तयेत्यंगु दु ।
घटनायात कयाः श्रीनवं धाःगु दु, ‘सुथय् ३ बजे पाखे पासा अनिस श्रेष्ठं नापं ट्वाइलेट वनेत थन । जि वया नापं वना । न्ह्याबलें न्हूम्ह पासा क्रिस थापां ट्वाइलेट वनेत थनीगु खः, तर उकुन्हु अनिसं थन । ट्वालेट थ्यंबलय् रिवाज रेग्मी ट्वाइलेटया लुखाय् सुलाच्वन । जितः वं दाल, अलेक्रिसं लिउनें वयाः जिगु गःपः ज्वनाः अंगलय् न्याकल । अथेहे हितिफ्वलय् छ्यं न्याकेयंकूबलय् हितिफ्वः हे त्वःधुल । उबलय् हे मेपिं निम्ह सुयोग श्रेष्ठ व रिजन श्रेष्ठ ट्वाइलेट वःगु खः । तर उमित क्रिसं सुम्क च्वनाः बिसिउँ हुँ धाल । उमिसं गःपः ज्वंबलय् जि तसकं हालागु जिगु बेड पार्टनर सुयोग खनालं ताल । वं हे गार्डयात धाःवन । गार्ड वयेवं उपिं बिसिउँ वन ।’
क्रिसं थन च्वंम्ह विद्यार्थी छम्हेसित स्यात धाःसा थ्व स्कुल नं बन्द जुइ, अले थन च्वनाः ब्वने नं माली मखु धकाः मेपिं पासापिंत धायेगु यानाच्वंगु श्रीनवं कंगु दु । क्रिस न्हापा थुगु महाविद्यालयं हे खुगू तगिं तक ब्वनाः मेथाय् वंम्ह व हाकनं गुंगु तगिमय् भर्ना जूवःम्ह खः ।
घटना जूकुन्हु हे विद्यालयया निमित्त प्राचार्य भविलाल न्यूरें श्रीनवया अबु नवराज लामिछानेयात फोन याःगु खःसां घटनाया बारे धाःसा छुं मधाःगु खँ लामिछानें धाःगु दु । पीडित मचाया अभिभावकपिंसं थज्याःगु जघन्य घटना जुलं नं महाविद्यालयं घटना सुचुकेत स्वःगु द्वपं बिउगु दु ।
थ्व घटनायात कयाः नेपाली सेनाया प्रवक्ता गोकुल भण्डारीं स्वम्ह विद्यार्थीतय्त निलम्बन यायेधुनागु खँ धाःगु दु ।
LEAVE YOUR COMMENTS