न्हूगु पाठ्यक्रमया परीक्षण सुरु

येँ – देय् संघीय संरचना वनेधुंकाः थ्व संरचनायात ल्वयेक न्हूगु पाठयक्रम विद्यालय तहय् परीक्षण सुरु जूगु दु । शिक्षा, विज्ञान तथा प्रविधि मन्त्रालय मातहतया पाठ्यक्रम विकास केन्द्रं चालु शैक्षिक सत्रय् न्हय्गुलिं प्रदेशय् निगू जिल्लाया ल्याखं १८ जिल्लाया १०३ गू स्कूलय् नमूना परीक्षण सुरु याःगु खः ।

प्रदेश नं. ३ अन्तर्गत स्वनिगःया स्वंगुलिं जिल्लायात परीक्षणय् दुथ्याकूगु दु । केन्द्रं प्रारुपकथं कक्षा १या गणित, नेपाली, अंग्रेजी, मेरो सेरोफेरा लगायत विषयय् एकीकृत पाठ्यक्रमया कार्यपुस्तक व मार्गदर्शन विद्यालययात छ्वःगु दु । नेपाली कला, संस्कृति व मौलिक पहिचानमूलक विषयवस्तु व विश्वव्यापीकरणया प्रभावयात प्रारुपं आत्मसात याःगु दु ।

सरकारं नेपाःया संविधान, संघीय संरचना व समृद्ध नेपाःया परिकल्पना यानातःकथं विद्यालय शिक्षाया न्हूगु पाठ्यक्रमया प्रारुप पारित यानाः कार्यान्वयनय् हयेत केन्द्रं थ्व परीक्षण सुरु याःगु खः । केन्द्रया महानिर्देशक डा. लेखनाथ पौडेलं परीक्षणपाखें वःगु सुझावया आधारय् परिमार्जन यानाः वइगु शैक्षिक सत्रनिसें न्हूगु पाठयक्रम पूवंक कार्यान्वयनय् हयेगु खँ धयादिल ।

संविधान कथं स्थानीय तहं स्वीकृत यानाः स्थानीय पाठ्यक्रम कार्यान्वयनया क्रम नं सुरु जुइधुंकूगु दु । न्हूगु व्यवस्थां कक्षा १२ व १२ यात एकल पथीय दयेकाः कक्षा ९ व १०य् न्यागू अनिवार्य व निगू व्यावसायिक ऐच्छिक विषय तःगु दु ।

थ्व तहया नमूना पाठ्यक्रम दयेकेगु प्रक्रियाय् दु । केन्द्रं न्यादँ दुने न्हूगु प्रारुप कथं कक्षा १० तक न्हूगु पाठ्यक्रम कार्यान्वयनय् हयेगु योजना दयेकातःगु दु । थौंकन्हय् देशय् ३५ हजार ५५ मध्ये २७ हजार ७२८ गू सामुदायिक विश्वविद्यालय दु ।

सम्बन्धित बुखँ

LEAVE YOUR COMMENTS