ने. सं. ११४४ चौलाथ्व द्वादशी -

निदँया दुने निदुगं ल्वगि

यल – थन च्वंगु पाटन अस्पतालय् वइपिं ल्वगिया ल्याः निदुगं अप्वःगु दु । थौं स्वयां निदँ न्ह्यःया तुलानाय् लिपांगु इलय् अस्पताल वइपिं ल्वगिया ल्याः निदुगं अप्वःगु खः । तर अस्पताल वइपिं ल्वगिया ल्याः अप्वया वंसां व ल्याखं अस्पतालया पूर्वाधार मदुगुलिं ल्वगिया व्यवस्थापन यायेत थाकुयाच्वंगु अस्पतालं न्ह्यथंगु दु ।

निदँ न्ह्यःतक न्हियान्हिथं झण्डै झिंस्वसःया ल्याखय् बहिरंग सेवा (ओपीडी)इ ल्वगि वयेगु यानाच्वंगु खःसा आः वयाः थ्व ल्याखय् नं अप्वयाः निद्वःया हाराहारीइ थ्यंगु दु । अस्पतालय् मेमेगु सेवा कायेत वइपिं ल्वगिया ल्याः नं उतिकं अप्वया वनाच्वंगु अस्पतालं न्ह्यथंगु दु ।

देय्न्यंकंया थीथी थासं वइपिं ल्वगिया ल्याः न्हियान्हिथं अप्वया वनाच्वंगु पाटन अस्पतालया निर्देशक विष्णुप्रसाद शर्मां कनादिल । थुगु अस्पतालं बिया वयाच्वंगु सेवा चित्त बुझे जूगुलिं हे ल्वगिया ल्याः अप्वया वनाच्वंगु वय्कःया दावी दु । सेवाग्राहीयात अस्पतालं थःगु स्रोत व साधनं फत्तले सेवा बिया वयाच्वंगु दु ।

‘वय्कलं धयादिल, ‘जिमिसं थःपिंके दुगु साधन व जनशक्तिं फक्व सेवा ल्वगितय्त बिया वयाच्वनागु दु ।’चीधंगु क्षेत्रफलय् दुगु अस्पतालया प्यखेरं धइथें भवन दयेकेधुंकूगु दु । आः भवन दयेकेत नं म्हो जक खाली जग्गा ल्यनाच्वंगु निर्देशक शर्मां कनादिल । अस्पतालय् वइपिं ल्वगिया चाप अप्वःगुलिं अझ अप्वः सेवा विस्तार यायेमाःगु आवश्यक जुयाबिउगु दु ।

देय्न्यंकंया थीथी थासं वइपिं ल्वगिया ल्याः न्हियान्हिथं अप्वया वनाच्वंगु पाटन अस्पतालया निर्देशक विष्णुप्रसाद शर्मां कनादिल ।

गुलिखे भवन पुलां जुया वंगुलिं नं न्हूगु भवनया आवश्यक जूगु वय्कलं धयादिल । वय्कलं धयादी, ‘तर अस्पताल परिसरय् न्हूगु भवन
दयेकेत आः खाली जग्गा तसकं म्हो जक ल्यं दनि ।’अस्पतालय् प्रसूति सेवा कायेत व प्वाथय् दुपिं जांचया निंतिं वइपिं निगूकथंया ल्वगिया ल्याः अप्वयाच्वंगु दु ।

प्रसूति सेवा बीगुलिइ प्रसूति गृह लिपा थ्व अस्पताल स्वनिगःया निगूगु थासय् लाःगु अस्पताल जूगु शर्मां धयादिल । स्वनिगः व देय्न्यंकंया थीथी अस्पतालं सिफारिस जुयाः वइपिं ल्वगित नं थ्व हे अस्पतालय् वयेगु यानाच्वंगु दु । वय्कलं धयादिल, ‘प्रसुति सेवा झन् ह्वात्त हे अप्वःगु दु ।’ अस्पतालं परोपकार कोष स्थापना यानातःगु दु ।

गुगु कोषपाखें गरिब सेवाग्राहीयात निःशुल्क उपचार यायेगु यानाच्वंगु दु । अस्पतालय् याकनं सेवा कायेमाःपिं ल्वगितय् निंतिं निजी क्लिनिक नं दु । निजी क्लिनिकपाखें जूगु लबःपाखें हे निजी क्लिनिक संचालन जुयाच्वंगु खः ।वय्कलं धयादिल, ‘खर्च यानाः याकनं सेवा काये धाइपिंसं थिकेक शुल्क कयाः गरिब व असहाययात निःशुल्क सेवा बीगु जिमिगु उद्देश्य खः ।’

निजी क्लिनिक व साधारण सेवाय् निगुलिं सेवाय् गुणस्तर अथे अथे हे खःसां नं निजी क्लिनिकय् ल्वगितय्सं याकनं सेवा कायेखनी । गुलिखे ल्वगियात सघन उपचार कक्षय् तकं निःशुल्क उपचार यानागु निर्देशक शर्मां कनादिल । अस्पतालया सघन उपचार कक्ष न्ह्याबलें हुलमुल जुयाच्वनेगु याः ।

थथे जुइबलय् ल्वगितय्त बँय् हे तयाः नं उपचार यायेगु याना वयाच्वनागु निर्देशक शर्मां कनादिल । वय्कलं धयादिल, ‘जिमिसं गुकथं फु, उकथं हे उपचार सेवा बिया वयाच्वनागु दु ।’ उपचार हे मयासे सुं नं ल्वगियात लित छ्वयेगु याना मच्वनागु वय्कःया धापू दु । दक्वं कथंया ल्वगियात नं समान व्यवहार यायेगु उद्देश्य दुगु अस्पतालं न्ह्यथंगु दु ।

ध्यबा हे जक स्वयाच्वने मजिउ, गुम्हेसिकें ध्यबा दयाच्वनी, गुम्हेसिकें दइमखु । ध्यबा दुपिं व मदुपिं ल्वगित उपचार याये मखनाः लिहां वनेम्वाःगु वय्कःया दावी दु । वय्कलं धयादिल, ‘बँय् तयाः उपचार यायेगु तर, सुं ल्वगियात लित मछ्वयेगु हे जिमिगु उद्देश्य खः ।’