ने. सं. ११४३ चौलाथ्व पारू -

मेयरयात आक्रमण लिपा छेँय् तोडफोड

येँ – मध्यपुर थिमि नगरपालिका प्रमुख मदनसुन्दर श्रेष्ठया छेँय् तोडफोड जूगु दु । वंगु बैशाख ८ गते छुं मनूतय् आक्रमणय् लानाः घाःपाः जुयाः वासः याकाच्वनादीम्ह प्रमुख श्रेष्ठया छेँय् उकथं तोडफोड याःगु खः । वय्कःयात थःगु छेँय् आक्रमण याःगु खःसा वयां लिपा घाःपाः जूम्ह वय्कः थौंकन्हय् नेपाल कोरिया मैत्री अस्पतालय् वासः याकाच्वनादीगु दु ।

प्रमुख श्रेष्ठया छेँय् सहकारी संचालन याना वयाच्वनादीम्ह चन्द्रभक्त श्रेष्ठं घटनाया बारे जानकारी बियादिसें धयादिल, ‘सीसी क्यामराया दृश्य स्वयेबलय् निम्हेसिया पुचलय् वःपिंसं प्रमुख श्रेष्ठया छेँया मूलुखाय् तोडफोड यानाः वयां च्वय् नितँजाः जक लुखा नं तोडफोड यानाः बिसिउँ वंगु खनेदु ।’

उखे नेपाल कोरियामैत्री अस्पतालय् वासः याकाच्वनादीम्ह प्रमुख श्रेष्ठं धयादिल, ‘छेँय् तोडफोड जुल धइगु न्यना, जितः आक्रमण याःगु बाःछिं मल्याये धुंकाः नं आक्रमणकारी ज्वने फुगु मदुनि । आः हाकनं थःगु हे छेँय् नं तोडफोड जुल, ग्व छु कारवाही जकं जुइगु खः ला ?’

महानगरीय प्रहरी वृत्त थिमिया प्रमुख नापं प्रहरी नायब उपरीक्षक प्रज्वल महर्जनं नगरप्रमुखयात जूगु आक्रमणया घटनालिसे तोडफोडया घटना स्वानाच्वंगु खनेमदु धयादिल । वय्कलं छेँय् तोडफोड यायेगु नियत स्वयां नं खुइगु नियतं वःगु खयेमाः धइगु खनेदु धासें घटनायात कयाः अनुसन्धान शुरु जुइ धुंकूगु धयादिल ।

थ्व झ्वलय् मध्यपुर थिमि नगरपालिकाया प्रमुख श्रेष्ठयात जूगु आक्रमणया विरोध यायेत छगू संघर्ष समिति गठन याःगु दु । मध्यपुर थिमिइ स्थानीयवासीतय् छगू भेलां आक्रमणकारीयात तत्काल ज्वनेत दबाव बीत, नगर प्रमुखया रक्षा यायेत व घटनाया विरोध यायेत १५१ म्ह दुजः दुगु संघर्ष समिति गठन यानागु समितिया नवीनप्रकाश श्रेष्ठं जानकारी बियादिल ।