मेलम्ची पाइप लायेत सतक म्हुइगु
येँ- ÷ बहुप्रतिक्षित मेलम्ची खानेपानी आयोजनाया कारणं सतक कालोपत्र यायेगु ज्याय् अलमल जूगु दु । आयोजनां मेलम्चीया लः वितरण यायेत पाइप लायेगु निंतिं सतक म्हुइगु धायेवं थनया त्रिपुरेश्वरनिसें कालिमाति–कलंकी सतकखण्ड कालोपत्र यायेगु ज्या लिज्याः वंगु खः ।
स्वनिगलय् दकलय् अप्वः सवारी व यात्रुतय् चाप अप्वइगु थाय्मध्ये छगू उगु सतकखण्डय् ताःई न्ह्यःनिसें कालोपत्र यायेगु ज्या थातिं लानाच्वंगु खः ।
सतक कालोपत्र यायेगु ज्याय् जुयाच्वंगु ढिलासुस्तीया कारणं उगु लँपु जुयाः वये वने यायेमाःपिं यात्रु व स्थानीवासीतय्सं धू व कुँया समस्या फयेमालाच्वंगु दु ।धू व कुँया समस्याया दथुइ नं काठमाडौं खानेपानी लिमिटेड आयोजना कार्यान्वयन निर्देशनालयं पाइप लायेगु जानकारी बिउगु खः । सतक कालोपत्र यायेवं हाकनं सतक म्हुइ मालीगु जुइवं आवश्यक समन्वय यानाः जक कालोपत्र यायेत धयागु आयोजनां न्ह्यथंगु दु ।
सोल्टीमोडनिसें कलंकीतक मोहनि न्ह्यः हे सतक कालोपत्र यायेमाःगु खःसां नं मेलम्चीया पाइप लायेत सतक हाकनं म्हुइमालीगु जुइवं कालोपत्र यायेगु ज्या लिज्याः वंगु जक मखसे सतक म्हुइत स्वीकृतिया निंतिं इनाप यायेगु ज्या तकं जुइधुंकूगु आयोजनां जानकारी बिउगु दु ।येँ महानगरपालिका १४ नं. वडा ज्याकुथिं नं पाइप लायेधुंकाः जक कालोपत्र यायेगु सुचं बिउगु दु ।
LEAVE YOUR COMMENTS