बुलेट गयाः भम्चा ….

इहिपा छगू अज्याःगु संस्कार खः, गुकी ब्याहा याइम्ह मिजंनं भम्चा काः वनी । भम्चा कायेत गुलिसिनं बाजं थानाः वनीसा गुलिं स्वयम्बर जक यानाः विधिपूर्वक भम्चा दुचायेकीपिं नं दु । आखिर न्ह्यागु जूसां ब्याहा याइम्ह मिजंनं भम्चा काः वनीगु इहिपाया संस्कार खः ।
भारतया पुणे सहरय् धाःसा छगू अजू चायापुगु इहिपाया ज्याझ्वः जुल, गुगु इहिपा मेमेगु इहिपा स्वयां तसकं फरक खः ।

इहिपा याइम्ह मिजंनं भम्चा काः वनेमाःगु थासय् थन धाःसा भम्चां ब्याहा याइम्ह मिजंयात काः वन । व नं कारय् मखु बुलेट मोटरसाइकल गयाः, भम्चा थम्हं हे बुलेट गयाः ५ किलोमिटर तापाक मिजंया छेँय् थ्यंकः वंगु खःसा अन इहिपाया निंतिं दयेकातःगु मण्डपय् च्वनाः इहिपाया विधि पूवंकेगु ज्या जूगु खः ।

पुणेया छगू गां केडगाउँया कोमल देशमुखं समाजय् मिसापिं नं मिजं स्वयां कम मजू धइगु सन्देश बीत उकथं अजू चायापुगु ज्या यानागु प्रतिक्रिया बिउगु दु । कोमलं धाःगु दु, ‘छु ब्याहा याइम्ह मिजं नं जक हे जन्ती ज्वनाः भम्चा काः वनेमाः धकाः गनं च्वयातःगु दु ला ?’
जन्तीसहित ब्याहा याइम्ह मिजंयाथाय् थ्यंकः वंम्ह कोमलया धापू दु कि ‘जन्ती ज्वनाः वनेगु मिजंतय्गु जक कपिराइट मखु ।’

कोमलं भम्चाया वसतय् उकथं बुलेट मोटरसाइकल गयाः वनाच्वंगु इलय् उगु दृश्य स्वया च्वंपिंसं न्हापाला छुं फिल्मया शुटिंग जुइमाः धकाः तायेकाच्वंगु खः । टलक्क थीगु बुलेट मोटरसाइकलय् च्वनाः ह्याउँक भम्चाया वसतय् छायेपियाः हाकुगु चश्मा तयाः जःखः जन्ती वःपिनिगु दर्जनौं कारसहित ५ किलोमिटर यात्रा यानाः ब्याहा याइम्ह मिजंया छेँय् थ्यंकः वंगु इलय् वया मिजंया छेँय् च्वंपिं सकसिनं तःजित लसकुस याःगु खः ।