सापकोटायात ज्वनेत रिट दायर

येँ (नेपालभाषा टाइम्स)÷ सभामुखया उम्मेदवार अग्नि सापकोटा– यात ज्वनाः अनुसन्धान यायेमाःगु माग यासें सर्वोच्च अदालतय् रिट लाःगु दु । वरिष्ठ अधिवक्ता दिनेश त्रिपाठीं उगु रिट तयादीगु खः । सापकोटायात काभ्रेया अर्जुन लामायात स्याःगु द्वपनय् लामाया कलाः पूर्णिमाया लामां सर्वोच्चय् रिट तयातःगु खः । उगु मुद्दा सर्वोच्चय् विचाराधीन अवस्थाय् दु । थौं च्वनीगु संसदं सापकोटायात निर्विरोध सभामुख ल्ययेत्यंगु दुसा थौं हे अदालतय् सापकोटाया पेशी नं तयातःगु दु ।

मेखे राष्ट्रपति विद्यादेवी भण्डारीया सल्लाहकार लिसें मानव अधिकारकर्मी सुशील प्याकुरेलं नं सापकोटायात सभामुख दयेकेत्यंगु खँय् असन्तुष्टि प्वंकुसें सल्लाहकारं राजीनामा बियादीगु दु । सापकोटा विरुद्ध न्हापा प्याकुरेल लगायतया पुचलं मानव अधिकार सम्बन्धी खँयात कयाः हे मुद्दा दर्ता यानातःगु दु । थ्व मुद्दा नं विचाराधीन तिनि । थःपिंसं हे मुद्दा तयाम्ह मनू राष्ट्रपति भवनय् वयाः शपथ ग्रहण याः वइगु जूगुलिं प्याकुरेलं नैतिकताया आधारय् राष्ट्रपतिया सल्लाहकार पदं राजीनामा बियादीगु खः ।

२०६८ सालय् बाबुराम भट्टराई  नेतृत्वया सरकारं सापकोटायात सूचना तथा सञ्चार मन्त्री दयेकूगु इलय्
वय्कःया विरुद्ध सर्वोच्च अदालतय् रिट दायर जूगु खः । सर्वोच्चया आदेश कथं छानविनया ज्या मन्ह्यायेवं २०७२ चैत २६ गते च्याम्ह मानवअधिकारकर्मीतय्सं मेगु मुद्दा दायर याःगु खः । उगु मुद्दा दायर याःपिं च्याम्ह मध्ये छम्ह प्याकुरेल नं खः । थम्हं दायर यानागु मुद्दा संवैधानिक इजलासय् विचाराधीन जुयाच्वंगु इलय् सापकोटा सभामुख जुइगु जुइवं प्याकुरेलं नैतिक रुपं राजीनामा बिउगु खः । सापकोटा विरुद्ध म्हिगः नं माइतीघर मण्डलाय् प्रदर्शन जूगु खः ।

सम्बन्धित बुखँ

LEAVE YOUR COMMENTS