येँय् दकलय् अप्वः जनसंख्या

येँ (नेपालभाषा टाइम्स)- राष्ट्रिय तथ्यांक कार्यालयं २०७८ य् काःगु राष्ट्रिय जनगणनायात तथ्यांक सार्वजनिक याःगु खः । सार्वजनिक जूगु तथ्यांक कथं नेपाःया कूल जनसंख्या २ करोड ९१ लाख ६४ हजार ५७८ थ्यंगु दु । थुकी मध्ये मिजंतय् जनसंख्या ४८.९८ प्रतिशत दुसा मिस्तय् ५१.०२ प्रतिशत दु । मेगु लिङ्गया जनसंख्या धाःसा मुक्कं २९२८ म्ह जक दु । थ्व कूल जनसंख्याया ०.०१ प्रतिशत जक खः । झिदँ न्ह्यः नेपाःया जनसंख्या २ करोड ६४ लाख ९४ हजार ५०४ म्ह दुगु खः ।

देय्न्यंकं वार्षिक औसत जनसंख्या वृद्धिदर ०.९२ प्रतिशत दुसा दकलय् अप्वः जनसंख्या वृद्धि जूगु जिल्ला धाःसा ख्वप जूगु दु । ख्वपय् वार्षिक औसत जनसंख्या वृद्धिदर ३.३५ प्रतिशत दु । येँ जिल्ला व येँ महानगरपालिका दकलय् अप्वः जनसंख्या दुगु जिल्ला व नगरपालिका जूगु दु । येँ जिल्लाय् २० लाख ४१ हजार ५८७ म्ह जनसंख्या दुसा येँ महानगरपालिकाय् ८ लाख ६२ हजार ४०० म्ह दु । दकलय् म्हो जनसंख्या दुगु जिल्ला मनाङ खः । मनाङय् मुक्कं ५ हजार ६५८ म्ह जक मनू दु ।