शिकागोय् नेवाः भाय् स्यनेगु व अन्तक्रिया ज्याझ्वः

येँ – नेवाः अमेरिकन दबूया ग्वसालय् दँय्दसं थें थुगुसी नं नेवाः भाय् स्यनेगु नापं अन्तक्रिया ज्याझ्वः जुल । उगु ज्याझ्वः हलिं नेवाः दबूया पुलांम्ह वरिष्ठ लिउ नायः दयारत्न शाक्यया सभापतित्वय् न्ह्याःगु खः । दबूया पुलांम्ह नायः श्रवणकुमार श्रेष्ठं उलेज्या यानादीगु ज्याझ्वलय् मू वक्ताकथं झायादीम्ह पुष्पहिरा तुलाधर व ज्याझ्वःया सभापतित्व यानादीम्ह शाक्ययात खादां क्वखायेकाः लसकुस यायेगु ज्या जूगु खः ।

वय्कःपिंत दबूया पुलांम्ह नायः श्रेष्ठ व ल्यू नायः श्रद्धाकमल ताम्राकारं खादा क्वखायेकाः लसकुस यानादीगु खःसा राधाकृष्ण श्रेष्ठ व विवेक श्रेष्ठं स्वां लःल्हानादीगु खः । ज्याझ्वलय् थौंकन्हय् शिकागोय् च्वँच्वनादीम्ह काठमाडौं जेसिसया पुलांम्ह प्रेसिडेन्ट तुलाधरया म्हसीका दबूया पुलांम्ह नायः केशरमान ताम्राकारं बियादीगु खः ।

नेवाः कक्षा संचालन कवःया कजि जुनुकमल तुलाधरं नेवाः भाय् स्यनेगु ज्या गुकथं न्ह्यानाच्वंगु धइगु बारे जानकारी बियादीगु उगु ज्याझ्वलय् मू वक्ता तुलाधरलिसे ‘नेपालय् घरेलु उद्योग मिसा नेतृत्व’ विषययात कयाः अन्तक्र्रिया ज्याझ्वः नं जूगु खः । ज्याझ्वःया सभा नायः भाजु शाक्यं नेपालभाषा विषय स्यनेगु व सयेके माःगु आवश्यकता बारे ध्वाथुइकादिल ।

दबूया पुलांम्ह नायः श्रेष्ठं दबूया गतिविधियात कयाः जानकारी बियादिसें थःगु नुगःखँ तयादीगु ज्याझ्वलय् नेवाः कक्षा संचालन कवःया कजि तुलाधरं सुभाय् देछानादीगु खः । शिकागो पब्लिक लाइब्रेरीइ जूगु कक्षाय् न्यय्म्ह स्वयां अप्वःसिनं ब्वति कयादीगु खः ।

सम्बन्धित बुखँ

LEAVE YOUR COMMENTS