ख्वप देय् सायाःया कारणं संचारविहीन

ख्वप – ख्वपया सांस्कृतिक महत्व कुबियातःगु सापारु नखः हनेत धासें ख्वप नगरपालिकां नगर लागा दुनेया टेलिफोन, इन्टरनेट व केबुलया तार चाना बीवं ख्वप नगरया स्थानीयवासिन्दा संचारविहीन जुयाच्वनेमाःगु दु । ख्वप नगरपालिकां सापारुया झ्वलय् पिहां वइगु सायाःयात व्यवस्थित यायेत धासें वंगु शुक्रवाःनिसें नेपाल टेलिकमया निद्वः लाइन टेलिफोन व इन्टरनेट सेवा अवरुद्ध जुइकथं तार चाना बिउगु नेपाल टेलिकमया कर्मचारी प्रकाश अधिकारीं कनादिल ।

प्रमुख जिल्ला अधिकारी नारायणप्रसाद भट्टया निर्देशनय् ख्वप नगरपलिकालिसें केबुल टेलिभिजनया स्वद्वः व मेमेगु नं इन्टरनटे सेवा प्रदायकया द्वः तार चानाबीवं ख्वप नगर क्षेत्र संचारविहीन जूगु ख्वप नगरपालिका–९ या कृष्णराम कुम्पाखं कनादिल । टेलिफोन, इन्टरनेट व केबुल टिभी सेवा अवरुद्ध जुइवं स्थानीयवासीं विरोध यासें तत्काल लाइन जडान यायेत माग याःगु दु ।

मानवीय जीवनया अत्यावश्यक सेवाया रुपय् दुगु संचारया दक्वं सुविधा अवरुद्ध जुइवं ख्वपया वासिन्दा अलमलय् लाःगु वय्कःपिनि धापू दु ।
थ्व स्वयां न्ह्यः सायाःया इलय् जक मखु बिस्काःलिसें मेमेगु जात्रापर्वया इलय् संचार सेवा अवरुद्ध यायेगु ज्या मयाःसां थुगुसी धाःसा ख्वप नगरपालिकां संचारया दक्वं लाइन चाना बिउगु वडा नं ६या चन्द्रमान लावं कनादिल ।

जिल्ला प्रशासन ज्याकू व नगरपालिकाय् वनाः चाना बिउगु टेलिफोन, केबुल टिभी व इन्टरनेटया लाइन तत्काल जडान यायेत माग याःसा बेवास्ता यानाच्वंगु मेम्ह स्थानीयवासी महेन्द्र ताल्चा भँडेलं धयादिल । नेपाल टेलिकमया कर्मचारी ध्रव भण्डारीं नगरपालिकां टेलिकमया हे स्वाहाने वा ज्याभःत छ्यलाः निद्वः टेलिफोन लाइन चाना बिउगु धयादिल ।

वय्कलं सेवा जडान यायेबलय् तार मिले यायेत समस्या वइगु नं धयादीगु दु । प्रजिअ भट्टं धाःसा स्वंगुलिं वडाया अध्यक्ष वयाः तारया कारण साःया संचालन यायेत समस्या जूगु धासें लाइन चायेत माग यायेवं समिति दयेकाः लाइन चानागु धयादिल ।

वय्कलं वडाअध्यक्षसहितया नेपाल विद्युत प्राधिकरण, नेपाल टेलिकम, जिल्ला प्रशासन ज्याकूतकं दुथ्याःगु समिति दयेकाः स्थलगत अध्ययन यानाः सायाः न्ह्याइगु लँपुइ समितिया निर्णयकथं लाइन चानगु धयादिल । सायाः सिधयेवं चाना बिउगु लाइन दक्वं हाकनं जडान यायेगु वय्कलं धयादिल ।