राजु पाण्डेया ख्वबियात कयाः नं ट्रोल
येँ (नेपालभाषा टाइम्स) – गोकर्णेश्वरय् सतक विस्तार यायेगु झ्वलय् सेनाया अधिकृत लिसे जूगु विवादय् थःत ट्रोल यात धकाः अन्तर्वार्ता बीगु झ्वलय् रास्वपाया सांसद राजुनाथ पाण्डे ख्वःगु नं सामाजिक सञ्जालय् नं ट्रोल जूगु दु । पाण्डें अन्तर्वार्ता बीगु झ्वलय् थम्हं विकास यायेगु निंतिं डोजर ज्वनाः वनागु खःसां उगु खँयात कयाः थःत ट्रोल यात धासें अन्तर्वार्ताया झ्वलय् ख्वःगु खः ।
अन्तर्वार्ताया झ्वलय् पाण्डे ख्वःगु खँयात कयाः छम्हेस्यां च्वःगु दु, ‘गरिबतय्त लिउबलय् महाःगु ख्वबि आः थःत लायेवं हाःगु दु । गुम्हेसिनं धात्थें पीडाय् ख्वबि हायेकी, गुम्हेस्यां ग्वंजं थें ख्वबि हायेकी । थ्व मनू न्हापा येँ महानगरया विधान कथं चले मजू, वालेन्द्रं छु छु धाल वहे यात, व नं गुण्डा शैलीं । थ्व मनुखं साइकलवालायात मत्वःतू, कःनि मीम्हेसित लुटे यात, ठेलावालायात दायेगु यात । बालेन्द्रया योजनाय् थ्वं गरिबी मखु, शहरं गरिब व याना नइपिंत लीगु ज्या यात ।
शहर सफा याइपिं कवाडी व्यवसायी थ्वया प्रधान शत्रु खः । महानगरय् दुगु इलय् सुकुम्बासीयात लिनाछ्वयेगु कुतः यात । महानगरया कानुनय् छु छु मदु व फुक्कं यात । उगु हे शक्तियाबलय् आः नेपाली सेनाया अधिकृतयात नं हप्की दप्की यायेगु ज्या न्ह्याकल । थ्व फुक्कं शक्ति व हे बालेन्द्रया कारणं चूलाःगु खः ।’
उकथं हे नेकपा एमालेया नेता महेश बस्नेतं च्वःगु दु, ‘मेपिंत पीडा बीबलय् कठोर, थः आलोचित जुइबलय् भावुक’ । बस्नेतं सामाजिक सञ्जालय् सेनाया अधिकृत लिसे जूगु भनाभन लिपा तीव्र आलोचना फयाच्वंम्हसिया भावुकतायात ‘नक्कली अभिनय’ व ‘ग्वंजया ख्वबि’ या संज्ञा बिउगु दु । उकथं हे बस्नेतं येँया द्वलंद्वः सुकुम्बासीयात छेँ बिहीन यानाः मिखां ख्वबि हायेकेत बाध्य याःपिं हे थौं सामान्य न्ह्यसः ब्वलनेवं भावुक जूगु द्वपं बिउगु दु ।
उकथं हे बस्नेतं प्रधानमन्त्री बालेन शाहया लोकप्रियताया नां मियाः थःत ‘अब्बल शासक’ तायेकूगु धासें आपत्ति नं प्वंकूसें समाजं थज्याःपिं पात्रतय्त इलय् म्हसिकेमाः धकाः च्वःगु दु ।
LEAVE YOUR COMMENTS