ने. सं. ११४३ तछलाथ्व दशमी -

ब्राजिलया बसय् यात्रा यानाच्वंपिं झिंखुम्हेसित बन्धक दयेकल

येँ (एएफपी) – ब्राजिलया निगूगु तःधंगु शहर रियो दि जेनेरियोय् मंगलवाः छम्ह बन्दुकधारीं बसय् यात्रा यानाच्वंपिं झिंखुम्हेसित बन्धक दयेकूगु खँ ब्राजिलीयाली अधिकारी धाःगु दु । प्रहरीं बन्धक दयेकातःपिंत त्वःतेकेत उम्ह मनूलिसे वार्ता न्ह्याकूगु स्थानीय सञ्चारमाध्यमं धाःगु दु ।

अथे हे म्हिगः हे समाचार तयार यानाच्वंगु इलय् तक बन्धक दयेकूपिं खुम्ह अपहरणकारीया कब्जां मुक्त जुइत सफल जूगु खँ नं अनया सञ्चार माध्यमं धाःगु दु । अपहरणकारीं रियो व जःलाःखःला शहर नितेर स्वाइगु तांय् बसयात दिकातःगु िलं प्रहरीं उमित त्वःतकेत कुतः याःगु खः ।

ब्राजिलया जी–वन समाचार संस्थाया कथं बसयात अत्याधुनिक हतिया रं सुसज्जित प्रहरीया पुचलं थःगु घेराय् तयाः आधुनिक हतियार व विस्फोटक पदार्थ घानातम्ह अपहरणकारीलिसे वार्ता यानाच्वंगु दु । बन्दुकधारी उम्ह मनू स्थानीय ई कथं सुथय् ५ः३० बजे बसय् गःगु छुं ई लिपा यात्रुयात बन्धक दयेकूगु धासें उखेथुखे मसनेत ख्याच्वः बिउगु खः ।

उगु घटनाया कारणं रियो–नितेर तां जुयाः चले जुइगु मेगु यातायात साधन नं अवरुद्ध जूगु दु । घटनास्थलं प्रत्यक्ष प्रशारण यानाच्वंगु टेलिभिजनं बसय् बन्दूकधारीं यात्रुयात बन्धक दयेकाःतःगु व जःखः एम्बुलेन्स सहित सुरक्षाकर्मी सतर्क अवस्थाय् दुगु क्यनाच्वंगु दु ।

अपहरणकारी छुं नं कथंया माग तःगु वा मतःगु बारे छुं नं खँ सीमदुनी । लिपांगु इलय् ब्राजिलया रियो दि जेनेरियोय् बन्दूकधारीपाखें नागरिकयात बन्धक दयकेगु व हत्या यायेगु अप्वयाः वनाच्वंगु दु ।