नेपाः व इजरायलया विश्वविद्यालय दथुइ सम्झौता
येँ – नेपाः व इजरालया निगू तःधंगु विश्वविद्यालय दथुइ छगू सम्झौता जूगु दु । नेपाः व इजरालय दथुइ शैक्षिक, सांस्कृतिक, प्राविधिक, वैज्ञानिक, वातावराणीय क्षेत्रय् थवंथवय् जुया वयाच्वंगु सहकार्ययात अझ सघन रुपं न्ह्यःने यंकेगु लक्ष्यलिसें उगु सहमति जूगु खः ।
नेपाःया दकलय् तःधंगु त्रिभुवन विश्वविद्यालय (त्रिवि) व इजरायलया दकलय् तःधंगु तेल अभिभ विश्वविद्यालय (टीएयु) दथुइ इजरायलया तेल अभिभय् जूगु छगू बःचाधंगु ज्याझ्वःया दथुइ समझदारी पत्रय् ल्हाःचिं तयेगु ज्या जूगु खः ।
समझदारी पत्रय् त्रिविया रेक्टर प्रा. डा. शिवलाल भुसाल व इजरायलयापाखें तेल अभिभ विश्वविद्यालयया उपसभापति प्रा. मिलेट्टी शमिरं भर्चुअल माध्यमं ल्हाःचिं तयादीगु खः । अथे हे उगु इलय् त्रिवि अन्तर्गतया पुल्चोक इन्जिनियरिङ क्याम्पस व तेल अभिभ विश्वविद्यालयया विपद् व्यवस्थापन विभाग दथुइ न्हापा हे भर्चुअलमाध्यमं ल्हाःचिं तयाः सम्झौता जुइ धुंकूगु समझदारी पत्र नं सार्वजनिक याःगु खः ।
विभागस्तरय् जूगु सम्झौता पती पुल्चोक इन्जिनियरिङ क्याम्पसया पूर्वाधार विकास अध्ययन केन्द्रया निर्देशक प्रा. डा. जगतकुमार श्रेष्ठ व तेल अभिभ विश्वविद्यालया विपद् व्यवस्थापन विभागया प्रमुख डा. ब्रुरिया अदिनीं ल्हाःचिं तयादीगु खः ।
ल्हाःचिं तयेगु ज्याझ्वलय् इजरायलया निंतिं नेपाःया राजदूत डा. अन्जान शाक्य, तेल अभिभ विश्वविद्यालयया उपसभापति प्रा. मिलेट्टी शमिर, विपद् व्यवस्थापन विभाग प्रमुख ब्रुरिया अदिनी, नेपाली दूतावासया द्वितीय सचिव अर्जुन घिमिरे, नेपाःपाखें त्रिविया उप कुलपति प्रा. डा. धर्मकान्त बास्कोटा, नेपाःया निंतिं इजरायली राजदूत हनान गोदर, थापाथली क्याम्पसपाखें रामु न्यौपाने व नेपाःस्थित इजरायली दूतावासया केशव श्रेष्ठया सहभागिता दुगु खः ।
उगु इलय् इजरायलया निंतिं नेपाःया राजदूत डा. शाक्यं निगुलिं विश्वविद्यालययात भिंतुना बियादिसें कुटनीतिक सम्बन्ध कायम जूगु खुगू दशक पूवंगु ईतकया दुने निगू देय्या दथुइ न्ह्याबलें अटुट व सुमधुर सम्बन्ध दया वयाच्वंगु धासें लिपांगु इलय् थीथी ख्यलय् नं सहकार्य यायेकथं सम्बन्ध विस्तार जुया वनाच्वंगु खँय् लसता प्वंकादिल ।
LEAVE YOUR COMMENTS