नगर प्रहरीया लाठीचार्जय् पत्रकार नं घाःपाः
येँ (नेपालभाषा टाइम्स)÷ बुधवाः बहनी थनया लँुहितिइ बँपसल्या व नगर प्रहरी दथुइ जूगु ल्वापुइ लानाः छम्ह पत्रकार नं बांमलाक घाःपाः जूगु खँ सीदुगु दु । उकुन्हु हे येँनं कलंकी जुयाः बाग्लुङ लिहां वनेत्यंम्ह पत्रकार कपिल पौडेलयात लुँहितिइ नगर प्रहरीं ज्वनाः दायेफक्व दाःगु खः । पौडेलं थः बँपसल्या मखु, पत्रकार खः धकाः कार्ड क्यनं नं नगर प्रहरीं ककु ज्वनाः गाडीइ स्वथंगु खँ धाःगु दु ।
लुँहितिइ जुयाच्वंगु उगु ल्वापुया भिडियो खिचे यानाच्वंगु इलय् पौडेलयात नगर प्रहरीं दाःगु खः । नगर प्रहरीं वय्कःया क्यामेरा, मोबाइल व घडी समेत जफत याःगु धाःगु दु । नगर प्रहरीं दायाः घाःपाः याःगुलिं वय्कःयात बहनी हे अस्पताल यंकाः वासः याःगु खः । थ्व घटनाय् लानाः झिंछम्ह मनू घाःपाः जूगु धाःगु दु । घाःपाः जूपिं मध्ये छम्ह नगर प्रहरी नं लाःपाः जूगु दु ।
नगर प्रहरीं फुटपाथ पसल्यातय्त सँ ज्वनाः लुत्तु लुयाहःगु दृश्य सामाजिक सञ्जालय् भाइरल जुइवं म्हिगः येँ मनपाया प्रमुख प्रशासकीय अधिकृत प्रदिप परियारं नगर प्रहरी प्रमुख राजु पाण्डेयात सःताः घटना बारे न्यनेकने याःगु खः । नगर प्रहरीं थःपिंसं फुटपाथ पसः चीकः वनाबलय् पसल्यातय्सं हे आक्रमण याःगुलिं जक यानागु खः धकाः लिसः बिउगु दु । अथे खःसां नगर प्रहरीं कथि ज्वनाः पसल्यातय्त प्रहार याःगुलिं नगर प्रहरीयाके अथे लाठीचार्ज यायेगु कानुनी अधिकार दु लाकि मदु धकाः नं न्ह्यसः पिहां
वःगु दु ।
थ्वहे झ्वलय् उकी लानाः घाःपाः जूम्ह पत्रकार पौडेलया विषययात कयाः म्हिगः हे पत्रकारतय्गु छगू पुचः मनपाय् वनाः न्यनेकने याःवंगु दु । पत्रकारतय्सं वय्कःया मोबाइल, क्यामेरा आदि लित बीत नं माग याःगु दु ।
येँ महानगरपालिकाया प्रहरी बलं बल छ्यःगु घटनायात कयाः मानव अधिकारकर्मीतय्सं खेद प्वंकूगु दु । येँ महानगरया जननिर्वाचित नागरिक नेतृत्वं धैर्यताया लिसें संवादया माध्यमं समस्या ज्यंकेगु पलेसा महानगर प्रहरीमार्फत् अत्यधिक बल छ्यलाः सतक व्यापारीतय्त गम्भीर घाःपाः याःगु व उमिगु सामान लुटपाटया शैलीं जफत याःगु धासें खेद प्वंकूगु खः ।
मानव अधिकारवादीत कुन्दन अर्याल, चरण प्रसाईं, निराजन थपलिया, भगवती अधिकारी, विष्णुप्रसाद पोखरेल, जगत देउजा, प्रकाशमणि शर्मा व राजुप्रसाद चापागाईं मंकाः विज्ञप्ति पिकयाः घटनायात कयाः खेद प्वंकूगु खः ।
LEAVE YOUR COMMENTS