टर्किइ संकटकाल लित काल

टर्किइ सरकारं निदँ लिपा संकटकाल लितकाःगु दु । स्थानीय मिडियातय्सं निदँ न्ह्यव कू यायेत स्वःगु असफल जुइवं टर्कि सरकारं तयातःगु संकटकालयात लित काःगु समाचार च्वःगु दु । थ्व संकटकालया इलय् हजारौं मनूतय्त ज्वंगु खःसा हजारौं कर्मचारीतय्त बर्खास्त यानाबिउगु खः । सरकारं संकटकाल लागू याये धुंकाः तःक्वः हे थुकिया म्याद थप यानाः निदँ तक थ्यंकूगु खः ।

नकतिनि क्वचाःगु चुनाव लिपा वःगु सरकारं संकटकाल लित काःगु खः । थ्व चुनाव नं राष्ट्रपति पदय् रिचेप तैय्यप अर्दोआन हे त्याःगु खः । अर्दोआनयात हे निदँ न्ह्यव कु यायेत स्वःबलय् संकटकाल लागू याःगु खः । चुनावया इलय् विपक्षीतय्सं नं थःपिं चुनाव त्यात धाःसा दकलय् न्हापां संकटकाल लित कायेगु नारा थ्वयेकूगु खः ।

आधिकारिक तथ्यांक व स्वयंसेवी संस्थातय्सं मुंकूगु तथ्यांक कथं संकटकालया इलय् छगू लाख न्हय्द्वः सरकारी कर्मचारीतय्त बर्खास्त यानाबिउगु खःसा ५० हजारं मल्याक मनूतय्त ज्वंगु खः । ज्वनातःपिनि सुनुवाइ नं ल्यं दनि । सरकारं बर्खास्त याःपिं कर्मचारीत फुक्कं निर्वासित इस्लाम नेता मौलवी फतेहुल्लाह गुलेनया समर्थक जूगु खँ धाःगु दु ।