ने. सं. ११४६ दिल्लागा दशमी -

शिक्षक व वैदेशिक रोजगार व्यवसायीतय् आन्दोलनया घोषणा

म्हिगः निसें रोजगारया निंतिं मछ्वल

येँ (नेपालभाषा टाइम्स) – वइगु भदौनिसें नेपाल शिक्षक महासंघं हाकनं देय्न्यंकं आन्दोलन यायेगु घोषणा याःगु दु । सरकारलिसे तःक्वः तःक्वः जूगु सहमति कार्यान्वयन व विद्यालय शिक्षा सुधारया माग यासें आन्दोलन यायेगु निर्णय याःगु खः । नकतिनि क्वचाःगु महासंघया परिषद् बैठकया निर्णय सार्वजनिक यासें शिक्षक नेतातय्सं शैक्षिक व पेशागत माग पूवंकेत निर्णायक आन्दोलनय् वनेगु खँ धाःगु दु ।

महासंघया अध्यक्ष लक्ष्मीकिशोर सुवेदीं अग्रगामी विद्यालय शिक्षा ऐन जारी यायेमाःगु, शिक्षाय् लगानी अप्वयेकेमाःगु व विद्यालयय् जुइगु राजनीतिक हस्तक्षेप अन्त्य यायेमाःगु धाःगु दु । अथे हे बाल कक्षा शिक्षक, विद्यालय कर्मचारी व सिकाइ अनुदानया शिक्षकतय्गु तलब थकायेमाःगु, प्रोत्साहन भत्ता व महँगी भत्ताया व्यवस्था यायेमाःगु माग नं महासंघं याःगु दु ।

राहत, साविक उच्च माध्यमिक विद्यालयया अस्थायी/करार शिक्षक, बाल कक्षा, सिकाइ अनुदान, विशेष शिक्षा व प्राविधिक धारय् ज्या यानाच्वंपिं अस्थायी प्रकृतिया शिक्षकया पेसागत सुरक्षा व स्थायीत्वया निंतिं नं महासंघं माग याःगु दु । स्थायी शिक्षकया आवधिक बढुवा व बढुवा अनुपातय् वृद्धि यायेमाःगु व निवृत्तिभरण (पेन्सन) या निंतिं फुक्क कथंया स्याथी शिक्षकया मगाःगु सेवा अवधि थप यायेमाःगु विषययात नं आन्दोलनया एजेन्डा दयेकूगु दु ।

शिक्षा नियमावलीया १० क्वःगु संशोधनं याःगु सरुवा सम्बन्धी व्यवस्थायात ‘शिक्षक विरोधी व अव्यवहारिक’ जूगु ठहर यासें महासंघं उकियात हिलाः शिक्षकमैत्री दयेकेमाःगु माग नं याःगु दु । लिसें विद्यालय व्यवस्थापन समितिया अधिकार क्वपालेगु कुतः दिकेमाःगु व प्रधानाध्यापकयात धिसिलाःगु प्रशासनिकलिसे प्राज्ञिक पदाधिकारीया रुपय् व्यवस्था यायेमाःगु माग नं महासंघं याःगु दु ।

थ्व हे झ्वलय् वैदेशिक रोजगार व्यवसायी संघं नं आन्दोलनया घोषणा याःगु दु । आन्दोलनया घोषणाकथं म्हिगःनिसें लागू जुइकथं वैदेशिक रोजगार कम्पनीतय्सं वैदेशिक रोजगारय् श्रमिक छ्वयेगु ज्या बन्द याःगु दु । संघं म्हिगः छगू पत्रकार सम्मेलन यानाः देय्या अर्थतन्त्रय् रेमिट्यान्सया तःधंगु योगदान दुसां नीतिगत जटिलता, अव्यावहारिक व्यवस्था व समयसापेक्ष सुधार मजूगुलिं थुगु क्षेत्रया समस्या ज्यनेमफुगु खँ धाःगु दु ।

संघया अध्यक्ष डिकबहादुर खत्रीं विशेष परिस्थितिइ सरकारया निर्णय पालना यानागु इलय् व्यवसायीतय्त कारवाही याःगु धासें आवंनिसें म्यानपावर कम्पनीतय्सं श्रमिक छ्वयेगु बन्द यानागु घोाषणा यानादीगु खः । संघं वैदेशिक रोजगार ऐन २०६४ यात श्रमिकया पारदर्शी लागत व वैज्ञानिक सेवा शुल्क निर्धारण यासें समयसापेक्ष संशोधन यायेमाःगु, श्रमिक लक्षित गन्तव्य देय्या हवाई भाडा म्हो यायेमाःगु व कृत्रिम अभाव सिर्जना याइगु प्रवृत्ति अन्त्य यायेमाःगु माग याःगु दु ।

उकथं हे संघं वैदेशिक रोजगारय् वनीपिं श्रमिकतय्त बह्रः मतसे सहुलियतपूर्ण त्यासा बीगु व्यवस्था मिले यायेत नं माग याःगु दु ।