ने. सं. ११४६ दिल्लागा दशमी -

थाइल्याण्डया ब्वनेकुथिइ गोलीकाण्ड, च्याम्ह सित

बैंकक – थाइल्याण्डया राजधानी बैंककय् जूगु छगू गोलीकाण्डय् च्याम्ह सीगु दुसा १५ म्ह घाःपाः जूगु दु । राजधानी बैंककं उत्तरय् च्वंगु नोन्थाबुरी प्रान्तया छगू ब्वनेकुथिइ उगु गोलीकाण्ड जूगु खः । घटनाय् संदिग्ध धयातःम्ह उगु हे ब्वनेकुथिइ ब्वनाच्वंम्ह १४ दँ दुम्ह ब्वँमि जूगु धाःगु दु ।

डेब्सिरिन नोनथाबुरी ब्वनेकुथिया गुंगू तगिमय् ब्वनाच्वंम्ह ब्वँमिं थःगु हे ब्वनेकुथिइ याःगु गोलीकान्डय् न्याम्ह शिक्षक सीगु अन्तर्राष्ट्रिय संचारमाध्यमतय्सं जानकारी बिउगु दु । थ्व घटनाय् छम्ह ब्वँमि नं सीगु व मेपिं ब्वँमि घाःपाः जक जूगु धाःगु दु । घटनाय् १५ म्ह मल्याकं घाःपाः जूगु खः । घटना गोली कयेकूम्ह नं सीगु दु । छुं रिपोर्टय् प्रहरीया गोलीं सीगु व गुलिखेसिनं उम्ह ब्वँमिं थःत थम्हं गोलीं कयेकूगु खँ न्ह्यथंगु दु ।
उम्ह ब्वँमिं स्कुलय् गोली चले याये न्ह्यः थःगु छेँ च्वपिं अजि व बज्यायात नं गोलीं कयेकाः स्यानाबिउगु प्रहरीं धाःगु दु ।

प्रहरीयाकथं उम्ह ब्वँमिं म्होतिं नं २६ राउण्ड गोली कयेकूगु खःसा लिपा वयागुपाखें ३४ गः गोली नं बरामद याःगु खः । उम्ह ब्वँमिं गोलीं कयेकूगु बन्दुक वया हे बाज्यायागु जूगु धाःगु दु ।

थाइल्याण्डया प्रधानमन्त्री अनुतिन चार्नविराकुलं छगू पत्रकार सम्मेलन यासे थ्व तसकं ग्यानापुगु घटना जूगु व थज्याःगु घटना गबलें नं जुइ मजिउगु धाःगु दु ।

घटना जूगु इलय् ब्वनेकुथि जःखःया लागाय् ट्राफिक ठप्प जूगु एएफपीं न्ह्यथंगु दु । स्थानीय मिडियां घटना लिपा मस्तय् मांअबुपिंसं थः मस्त ज्वना वनाच्वंगु न्ह्यथंगु दु ।

थाइल्याण्डय् थुगु क्षेत्रय् बन्दुकया स्वामित्व उच्च दरय् दुगु थन जक थ्यंमथ्यं छगू करोड स्वयां अप्वः बन्दुक प्रचलनय् दुगु अनुमान याःगु दु ।