तयेगु खःसा ति अय्लाः …..या म्युजिक भिडियो पिदन

येँ (नेपालभाषा टाइम्स) – केभिएस लुभुया पिथना नेपालभाषाया म्येँ ‘तयेगु खःसा ति अय्लाः लिसा’ म्येँया म्युजिक भिडियो पिदंगु दु दु । वंगु बुधवाः जय नेपाल सिनेमा हल नंसालय् जूगु छगू ज्याझ्वःया दथुइ उगु म्युजिक भिडियोया पितब्वज्या याःगु खः ।

म्येँ हालामि सागर श्रेष्ठया सभापतित्वय् ख्यालिजुजु मदनकृष्ण श्रेष्ठया प्रमुख आतिथ्यताय् जूगु ज्याझ्वलय् केभिएस लुभुया कृष्णभक्त श्रेष्ठं लसकुस यानादीगु खः ।

लोकंह्वाःम्ह च्वमि अमृतरत्न शाक्यं च्वयादीगु व सुरेन्द्र श्रेष्ठं संगीत व म्युजिक एरेन्ज यानादीगु म्येँ सागर श्रेष्ठ व प्रतिमा वज्राचार्यं सः बियादीगु दु ।
म्युजिक भिडियोय् निर्वाण महर्जन व पल्पसा श्रेष्ठं अभिनय यानादीगु दुसा निर्देशन बालमुकुन्द प्रजापतिं यानादीगु खः ।

छाँयाकन व सम्पादन शैलेश श्रेष्ठ लुभुं यानादीगु म्युजिक भिडियो नेवाः मौलिकता व नेवाः संस्कृतियात विशेष बः बियातःगु दु ।

ज्याझ्वलय् मूपाहां ख्यालिजुजु मदनकृष्ण, समाजसेवीलिसें म्येँ हालामि सरिता महर्जन, वरिष्ठ सिने पत्रकार विजयरत्न असंबरें म्युजिक भिडियोया थीथी पक्षयात कयाः नुगःखँ तयादीगु खः ।

उगु इलय् मूपाहां श्रेष्ठं म्युजिक भिडियोया कलाकार, म्येँ हालामि, प्राविधिकपिंत हनापौ देछाःगु खःसा पाहांपिंत प्रोडक्सन हाउसपाखें मतिनाया चिं लःल्हाःगु खः ।