सिंगापुर वार्ताय् गोरखा सैनिकया चर्चा
येँ – सिंगापुरय् म्हिगः जूगु अमेरिकी राष्ट्रपति डोनाल्ड ट्रम्प व उत्तर कोरिया सर्वोच्च नेता किम जोङ उन दथुइ जूगु वार्ता विश्वया हे दकलय् चर्चित राजनीतिक घटना ला जु हे जुल । उकिया नापनापं अन सुरक्षाया भाला काःगु गोरखा सैनिक नं विश्वन्यंकं हे चर्चाया विषय जुया बिल ।
अमेरिका व उ. कोरिया थेंज्याःगु थवंथवय् निगू दुश्मन राष्ट्रया प्रमुखत वयाच्वंगु जूगुलिं वंगु स्वन्हु सिंगापुर विश्वया हे दकलय् संवेदनशील देश ठहर जुल । थज्याःगु अति संवेदनशील इलय् निगुलिं देशया सुरक्षाया भाला गोरखा सुरक्षाकर्मीयात बिउगुलिं थ्व छक्वलं हे विश्वय् चर्चाया विषय जूवंगु खः ।
सिंगापुर प्रहरीइ करिब निद्वःम्ह गोरखा दु । उकी मध्ये अधिकांशयात थ्व सुरक्षाय् प्रयोग याःगु खः । उमित ट्रम्प च्वंगु होटल सांग्रीला, किम च्वंगु सेन्ट रेगीज होटल व वार्तास्थल क्यापेला होटेलया सुरक्षाया जिम्मा बिउगु खः । थ्व गोरखा सुरक्षाकर्मीयात बेल्जिमय् निर्मित एफएन स्कार कम्बाट राइफलया नापं निपा तुतिइ निपु पेस्तोल बियातःगु खः ।
उकिया नापं गोरखाया चिं कथं छपु खुकुरी ज्वनेगु नं अनुमति बिउगु खः । वार्ताजःछि सिंगापुरया सुरक्षा गोरखा सुरक्षाकर्मीं याःगु धकाः फक्स न्युज, एबीसी न्युज, रायटर्स, एपी, टेलिग्राफ आदि यक्व हे सञ्चार माध्यमतय्सं विशेष रिपोर्ट दयेकूगु खः । उमिसं गोरखा सुरक्षाकर्मीयात ‘संसारया दकलय् निडर सैनिक’ धइगु उपमा बिउगु खः ।
सिंगापुरया माउन्ट भेर्नन धाःगु थासय् गोरखा सुरक्षाकर्मी जक च्वनीगु अलग्ग हे क्याम्प दु गन सिंगापुरया स्थानीय जनतायात तकं दुहां वनेगु अनुमति बियातःगु मदु । अन गोरखाया परिवार बाहेक मेपिं च्वने नं दइ मखु ।
LEAVE YOUR COMMENTS