ने. सं. ११४४ ञलाथ्व नवमी -

फ्रान्स विश्वविजेता, उत्कृष्ट कासामि मोडरिच

एजेन्सी- फ्रान्सं विश्वकप त्याकूगु दु । सन् १९९८ य् घरेलु मैदानय् विश्वकप त्याकेगू फ्रान्सं थुगुसी निक्वःखुसी विश्वकप ल्ह्वंगु खः । मस्कोया लुजनिक रंगशालाय् जूगु रोमाञ्चक कासाय् क्रोसियायात ४–२ गोलं बुकसें फ्रान्सं विश्वकप त्याकूगु खः ।

तसकं न्ह्याइपुगु कासा दथुइ क्वचाःगु थुगुसी फाइनल कासा सन् १९६६ लिपा दकलय् अप्वः गोल जूगु फाइनल कासा नं जूगु दु ।
थुगुसीया विश्वकपय दकलय् न्हापां भिडियो असिस्टेन्ट रेफ्रीया लबः काःगु फ्रान्सं फाइनल त्याकेत नं भारया लबः कायेखंगु दु । छगू छगू गोलया बराबरीइ जुइधुंकूगु अवस्थाय् भारया ग्वाहालिं डिएरियाय् क्रोसियाया फरवार्ड इभान पारिससया ह्याण्डबल जूगु स्वयाः पेनाल्टि थ्वायेगु ह्वःताः चूलाकूगु खः ।

फ्रान्सं कासाया १८ औं मिनेटय् आत्मघाती गोलया ग्वाहालिं अग्रता काःगु खः । एन्टोनि ग्रिज्म्यानं थ्वाःगु फ्रिकिक मारियो मान्ड्जुकिकया छ्यनय् लानाः पोस्टय् दुहां वंगु खः । तर थ्वयां १० मिनेट लिपा हे पारिससं उत्कृष्ट गोल यासें कासा बराबरीइ हःगु खः । तर न्हापांगु हाफ क्वचाये न्ह्यः हे फ्रान्सयात पेनाल्टि थ्वायेगु ह्वःताः चूलात । ग्रिजम्यानं पेनाल्टिइ याउँक गोल यासें न्हापांगु हाफय् २–१ गोलया अग्रता बियाबिल ।

निगूगु हाफ सुरु जुइवं क्रोसियां फ्रान्सयात दबाबय् लाकेगु सुरु याःगु खः, तर काउन्टर एट्याकय् कासाया ५९ औं मिनेटय् काइलिन एम्बाप्पेया पासय् पाउलो पोग्बां गोल यासें फ्रान्सयात अग्रता अप्वयेकाबिल । थ्वयां ७ मिनेट लिपा हे एम्बाप्पे मेगु गोल यासें फ्रान्सया विजय सुनिश्चित यानाबिउगु खः ।

स्वंगू गोलं लिउने लाःसां क्रोसियां जुझारु कासा न्ह्यब्वःगु खः । थ्व झ्वलय् फ्रान्सया कासामि ब्याक पास बिउगु बल गोलकिपर ह्युगो लोरिसं क्लियर यायेत स्वःबलय् मान्डुचुकिक न्ह्यःने बढे जुयाः पंगु बल पोस्टय् दुहां वनेवं क्रोसियाया खाताय् छगू गोल थप जूगु खः ।

विश्वकप विजेता फ्रान्सयात थौं हे विश्वकप लःल्हाःगु दुसा उत्कृष्ट कासामिपिंत नं थीथी सिरपाः लःल्हाःगु दु ।

उत्कृष्ट कासामि (गोल्डेन बल)
लुका माड्रिच, क्रोसिया