स्वयेबहपिं कासामि (लुका मोडरिक व डेनिस चेरिसेभ)
लुका मोडरिक, मिडफिल्डर, क्रोसिया
क्रोसियाया कप्तान लुका मोडरिक युरोपया छम्ह बांलाःम्ह मिडफिल्डर खः । क्रोसिया टिमया प्ले मेकर लुका मेडरिक सन् २००६ निसें क्रोसिया टिमय् म्हिता वयाच्वंगु दु । मोडरिकं थःगु न्हापांगु कासा अर्जेन्टिना विरुद्ध म्हितूगु खः ।
खुक्वः तक क्रोसियन फुटबलर अफ द इयर जूम्ह मोडरिकया थ्व स्वक्वःगु विश्वकप खः । मोडरिक सन् २००६ व २०१४ या विश्वकप म्ह्तिूगु दु । सन् २०१० या विश्वकपय् क्रोसिया छनोट जुइ मफुगु खः ।
रियल म्याड्रिडया लागि सन् २०१२ निसें म्हिता वयाच्वंम्ह मोडरिकं क्रोसियाया निंतिं १०९ गू कासा म्हिताः झिंप्यंगू गोल याःगु दु । थ्व विश्वकपय् नं मोडरिकं निगू गोल यायेधुंकूगु दुसा अर्जेन्टिना नाप जूगु कासाया म्यान अफ दि म्याच नं जूगु खः ।
डेनिस चेरिसेभ, मिडफिल्डर, रसिया
थ्व विश्वकपय् निगू देय्या नगारिकता दुपिं कासामि मध्ये छम्ह डेनिस चेरिसेभ नं खः । रसियाय् बूम्ह चेरिसेभ न्यादँ दुबलय्निसें स्पेन च्वना वयाच्वंम्ह खः । राष्ट्रिय टिमं फुटबल म्हितेत रसिया व स्पेन मध्ये छगू देश ल्ययेमाःबलय् चेरिसेभं रसिया ल्यःगु खः ।
स्पेनिस क्लब रियल म्याड्रिड च्वनाः फुटबल सयेकूम्ह चेरिसेभं सन् २०१२य् रसियाया टिमय् डेब्यु याःगु खः । चेरिसेभं न्हापांगु कासा अमेरिका विरुद्ध म्हितूगु खः । संयोग छु जुल धाःसा अमेरिका व हे टिम खः, गुगु टिमविरुद्ध डेनिस चेरिसेभया अबु डिमिट्रि चेरिसेभं नं डेब्यु याःगु खः । डिमिट्रि रसियाया पुलांम्ह फरवार्डर खः ।
थौंकन्हय् भिल्ला रियलया लेफ्ट विंगर जुयाच्वंम्ह चेरिसेभं रसियाया निंतिं झिंप्यंगू कासा म्हिताः स्वंगू गोल याःगु दु । चेरिसेभं स्वंगुलिं गोल थ्वहे विश्वकपय् याःगु खः । वं निगू गोल साउदी अरबविरुद्ध व छगू गोल इजिप्ट विरुद्ध याःगु खः ।
LEAVE YOUR COMMENTS