पुलांम्ह फुटबल कप्तान मणि शाह मन्त

येँ– नेपाली फुटबलया छगः नगू जुयाच्वंम्ह पुलांम्ह राष्ट्रिय कप्तान मणि शाह मन्त । नर्भिक अस्पतालय् वासः याकुयाकुं थौं वय्कः मदुगु खः । ताःई निसें स्येँ (कलेजो)या ल्वचं कयाच्वंम्ह वय्कःयात आइतवाः बहनी तच्वः जुया वयेवं नर्भिक अस्पतालय् भर्ना याःगु खः । सुथय् ज्वर वयाः आराम यानाच्वंम्हे शाहयात बहनी अस्पताल भर्ना याःगु खः ।

वि.सं. २०२४ असारय् बूम्ह मणि ५१ दँ दुम्ह खः । १७ दँ दुबलय् हे शाहं नेपाली राष्ट्रिय टिमय् थाय् दयेकूगु खः । सन् १९८५ इ ढाकाय् जूगु स्वक्वःगु साफ फुटबलपाखें मणिं राष्ट्रिय टिमय् डेब्यु याःगु खः । उगु कासाय् नेपाः स्वंगूगु थासय् लाःगु खः ।

न्याक्वः तक साफ फुटबल म्हितूम्ह मणिं उत्कृष्ट कासां यानाः हे सन् १९९३ य् न्हापांखुसी नेपालं साफ फुटबलय् स्वर्ण त्याकूगु खः । भारतलिसे जूगु फाइनल कासाय् छगू गोलं लिउने लानाच्वंगु अवस्थाय् मणिं फ्रिकिकपाखें याःगु गोलं कासा बराबरीइ वन । अले ट्राइबेकरय् उपेन्द्रमान सिंहं निगू पेनाल्टि बचे यायेवं नेपालं स्वर्ण त्याकेत ताःलाःगु खः । मणिया उगु फ्रिकिकया चर्चा नेपाली फुटबलय् न्ह्याबलें जुइगु याः ।

मणियात नेपाली फुटबलप्रेमीतय्सं नेपाःया म्याराडोना नं धायेगु खः । मणिं सन् १९९७ व १९९८ य् निदँ नेपाली राष्ट्रिय टोलीया नेतृत्व नं याःगु खः ।

सम्बन्धित बुखँ

LEAVE YOUR COMMENTS