ब्राजिल नं क्वाटर्रफाइनलय्
ब्राजिल पेरुयात बुकाः कोप अमेरिकाया क्वार्टरफाइनलय् दुहां वंगु दु । म्हिगः सुथय् जूगु कासाय् ब्राजिलं ५–० गोलं विजय चूलाकूगु खः । ब्राजिलया निंतिं कासेमिरो, रोबेर्टो फिर्मिनो, इभर्टन, डानी अल्भास व विलियनं छगू छगू गोल याःगु खः । थ्व विजय लिपा ब्राजिल ७ अंक सहित शीर्षस्थानय् च्वनाः क्वार्टरफाइनलय् दुहां वंगु खः ।
रियल म्याड्रिडया मिडफिल्डर कासेमिरों कासाया १२ औं मिनेटय् हे ब्राजिलयात अग्रता बिउगु खः । फिलिप कोन्टिन्हों थ्वानाहःगु कर्नरयात हेड यासें कासेमिरों न्हापांगु गोल याःगु खः । थ्वयां ७ मिनेट लिपा फिर्मिनों मेगु गोल यात । तापाकं थ्वानाहःगु बल पोस्टय् न्यानाः लिहां वयेवं गोलकिपरया न्ह्यःने दुम्ह फिर्मिनों गोलकिपरयात छले यानाः थ्व गोल याःगु खः ।
थ्व लिपा ३२ औं मिनेटय् इभर्टनं तापाकं निसें सुट थ्वानाः सुन्दर गोल याःगु खः । निगूगु हाफय् पेरिस सेन्ट जर्मनया डिफेन्डर अल्भेसं कासाया ५३ औं मिनेटय् प्यंगू गोल याःगु खःसा कासा क्वचायेत अन्तिम मिनेटय् विलियनं थप छगू गोल याःगु खः ।
कासाया ९३ औं मिनेटय् ब्राजिलयात थप छगू गोल यायेगु ह्वःताः वःगु खः, तर ग्राबियल जिससं थ्वाःगु पेनाल्टियात पेरुया गालेसें पनाबिल ।
ब्राजिलं क्वार्टरफाइनलय् समूह बी वा सी मध्ये स्वंगूगु थासय् लानाः उत्कृष्ट जूगु टिमलिसे क्वार्टरफाइनल धेंधेंबल्लाः याइ ।
LEAVE YOUR COMMENTS