विश्वकप पुलुपालु

पेलेया रेकर्ड बराबरी

विश्वकप फुटबल नकआउट चरणय् पूर्व विजेता फ्रान्सया निक्वःतकया विजेता व उपाधि दावेदार अर्जेन्टिनायात ४–३ गोलं बुकाः अन्तिम च्यागुलिं दुहां वःगु दु । फ्रान्सया विजयय् केलियन एम्बापे नायक जुल । अर्जेन्टिनायात बुकेगु निंतिं महत्वपूर्ण भूमिका म्हितूम्ह नापं कासाया म्यान अफ द म्याच तकं जुइत सफल फ्रान्सया ल्याय्म्ह स्टार कासामि एम्बापें विश्व फुटबलया लिजेन्ड ब्राजिलया पेलेया कीर्तिमानी नाप नं बराबरी याःगु दु ।

विश्वकपया नकआउट चरणय् निगू गोल याःम्ह फ्रेन्च कासामि एम्बापें पेलेया रेकर्ड नापं बराबरी याःगु खः ।सन् १९५८ या विश्वकप फुटबलय् मात्र १८ दँया उमेरय् पेलें ब्राजिलया निंतिं खुगू गोल याःगु खः । पेलेया थ्व हे रेकर्डयात बराबरी यायेगु झ्वलय् फ्रेन्च कासामि एम्बापें रुस विश्वकपय् शनिवाः अर्जेन्टिना विरुद्ध जूगु नकआउट चरणया न्हापांगु कासाय् निगू गोल याःगु खः ।

एम्बापें जारी विश्वकपय् स्वंगू गोल यायेधुंकूगु दु ।एम्बापें अर्जेन्टिना विरुद्धया कासाय् ४ मिनेटया अन्तरय् निगू गोल याःगु खः । ६४ औं मिनेटय् न्हापांगु गोल याःम्ह एम्बापें निगूगु गोल ६८ औं मिनेटय् याःगु खः ।

दकलय् स्टाइलिस टीम

रुसय् जुयाच्वंगु फिफा विश्वकप फुटबलया समूह चरणया सिधयाः नकआउट चरण शुरु जुइधुंकूगु दु । विश्वकपय् सहभागि राष्ट्रमध्ये बछि स्वयां अप्वः देय् लिहां नं वनेधुंकूगु दु ।

विश्वकपय् सहभागि राष्ट्र मध्ये छम्ह जक कासामिया आपालं चर्चा जुइगु न्हूगु खँ मखु । फुटबल कासा ‘टिम स्प्रिट’या कासा खयाः नं छम्ह जक कासामिया अप्वः चर्चा जुइगु छुं न्हूगु खँ मखये धुंकल ।

तर रुस विश्वकपय् धाःसा छगू टीमया व्यापक चर्चा जुयाच्वंगु दु । टिमया चर्चा कासाया प्रदर्शन वा विश्वकप हे त्याकीगु टीमया रुपय् धाःसा मखु । चर्चाया कारण खः दकलय् स्टाइलिस टिम ।

विश्वकपय् ब्वति कायेत रुसय् थ्यंकः वःगु इलंनिसें हे उपाधि दावेदार ब्राजिलया टीमयात ‘दकलय् स्टाइलिस टीम’या रुपय् कयातःगु दु ।
विश्वकपय् सहभागि जुइत रुस थ्यंकः वःगु इलय् ब्राजिलया सकलें कासामि, खेल पदाधिकारी, अफिसियलपिं वंचुगु सुट, सर्ट व टाई चिनाः वःगु खः ।

ब्राजिलया टीमया उकथंया प्रस्तुति स्वयेबलय् इपिं गुगुं कासाय् ब्वति कायेत वःगु स्वयां नं छुं सम्मेलनय् ब्वति कायेत वःगु थें खने दुगु खः । गुकिया कारणं स्टाइलिस टीमया रुपय् ब्राजिलया चर्चा जुयाच्वंगु खः ।

मास्चेरानोया सन्न्यास

रुस विश्वकपय् ‘सुपर सिक्सिटन’पाखें पिहां अर्जेन्टिनाया छम्ह सशक्त कासामि जाभिएर मास्चेरानों अन्तर्राष्ट्रिय फुटबलं सन्न्यासया घोषणा याःगु दु ।

शनिवाः फ्रान्स विरुद्ध प्रि–क्वार्टरफाइनल कासाय् ४–३ गोलया पराजय फयेवं अर्जेन्टिनाया डिफेन्सिभ मिडफिल्डर मास्चेरानों सन्न्यासया घोषणा याःगु खः ।

फ्रान्स विरुद्धया कासाय् मुक्कं कासा अवधिइ मैदानय् दुहां मास्चेरानों कासा सिधयेवं सन्न्यासया घोषणा याःगु खः । सन्न्यासया घोषणा यासें मास्चेरानों धाःगु दु, ‘आः जि छम्ह अर्जेन्टिनाया फुटबलया समर्थक व प्रशंसक जक खः, कासामिया रुपय् जिगु थ्व हे कासा लिपांगु जुल ।’

मास्चेरानों अर्जेन्टिनाया राष्ट्रिय टीमं १४७ कासा म्हितूगु दु । बार्सिलोनाया पुलांम्ह मिडफिल्डर मास्चेरानो थौंकन्हय् चीनया चाइना फोचच्र्युनपाखें व्यवासायिक फुटबल म्हिता वयाच्वंगु दु ।