च्याम्पियन्स लिग – पीएसजी, सिटी, रियल व लिभरपुल त्यात
एजेन्सी- युइएफए च्याम्पियन्स लिग अन्तर्गत मंगलवाः चान्हय् जूगु कासाय् फ्रेन्च क्लब पीएसजीं जर्मन क्लब आरबी लाइपजिगयात बुकूगु दु । समूह ‘ए’ या कासाय् पीएसजीं आरबी लाइपजिगयात ३–२ गोलं बुकूगु खः । पीएसजीया निंतिं लियोनल मेसीं निगू व केलियन एमबाप्पें छगू गोल यात । थुखें लाइपजिगया निंतिं आन्दे« सिल्भा व नोर्डी मुकिलीं छगू छगू गोलं यात । कासाया इन्जुरी इलय् पीएसजीयात पेनाल्टी वःगु खः । कासाय् निगू गोल यानाः ह्याट्रिकया लँय् दुम्ह मेसीं थःम्हं पेनाल्टी मथ्वासे एमबाप्पेयात मौका बिउगु खः, तर एमबाप्पेया प्रहार पिनेलाः वन ।
थ्व हे पुचलय् च्वंगु म्यानचेस्टर सिटीं बेल्जियमया क्लब ब्रुजयात ५–१ या तःधंगु अन्तरं बुकल । सिटीया निंतिं रियाद महरेजं निगू गोल यातसा जोआ कान्सेलो, केली वाल्कर व कोले पाल्मरं छगू छगू गोल याःगु खः । ब्रुजया हान्स भानाकेनं छगू सान्त्वना गोल याःगु खः । थ्व पुचःया शीर्ष थासय् पीएसजी व निगूगु थासय् म्यानचेस्टर सिटी दु ।
लिग अन्तर्गत मंगलवाः चान्हय् जूगु समूह बीया कासाय् लिभरपुलं एट्लेटिको म्याड्रिडयात व एफसी पोर्टाें एसी मिलानयात बुकल । लिभरपुलं एट्लेटिको म्याड्रिडयात ३–२ गोलं बुकूगु खः ।
लिभरपुलया निंतिं मोहम्मद सलाहं निगू व नेबी केइटां छगू गोल याःगु खः । एट्लेटिको म्याड्रिडया निंतिं एन्टोनियो ग्रिजम्यानं निगू गोल याःगु खः । निगू गोल यानाः कासा बराबरीइ हःम्ह ग्रिजम्यानं हे ह्याउँगु कार्ड नयेवं घरेलु टिम एट्लेटिको म्याड्रिड झिम्ह कासामिइ सीमित जूवंगु खः । कासा त्याःगु लिभरपुल पुचःया शीर्ष थासय् व पराजित एट्लेटिको म्याड्रिड निगूगु थासय् दु । पुचःया मेगु कासाय् स्वंगूगु थासय् च्वंगु एफसी पोर्टों एसी मिलानयात १–० गोलं बुकल ।
‘समूह सी’या कासाय् डच क्लब अयाक्सं बोरुसिया डर्टमण्डयात ४–० गोलं बुकल । अयाक्सया निंतिं डेले ब्लाइन्ड, एन्टोनी व सेबास्टिएन हेलरं गोल याःगु खः । मेगु छगू गोल आत्मघाती जूगु खः । डर्टमण्डया मार्को रिउसं आत्मघाती गोल याःगु खः । पुचःया आतक जूगु स्वंगुलि कासा त्याकाः अयाक्स शीर्ष थासय् दु । डर्टमण्ड पुचःया निगूगु थासय् दु । थ्व हे पुचःया मेगु कासाय् स्पोर्टिङं सिएफं बेसिमटासयात ४–१ गोलं बुकूगु दु ।
च्याम्पियन्स लिग अन्तर्गत मंगलवाः चान्हय् जूगु कासाय् ‘समूह डी’ या कासाय् रियल म्याड्रिडं साख्तर डोनेस्कयात ५–० गोलं बुकल । रियलया निंतिं भिनिसियस जुनियरं निगू गोल यातसां रोड्रिगो व करिम बेन्जिमा छगू छगू गोल यात । अथे हे साख्तरया सेही क्रिभ्टभोसं आत्मघातीं गोेल याःगु खः । मेगु कासाय् इन्टर मिलानं एफसी सेरिफयात ३–१ गोल बुकल । कासाय् पराजित जूसां सेरिफ पुचःया शीर्ष थासय् दु । रियल म्याड्रिडं निगूगु थासय् दु ।
LEAVE YOUR COMMENTS