संकटय् लाना वनाच्वंगु जुजुधौ

धौ । धौया नां कायेबलय् दकलय् न्हापां लुमनीगु जुजुधौ खः । इहि, इहिपा, कय्तापुजा, बुन्हि, जंक्व, ज्याजंक्व थेंज्याःगु छुं नं लसता भ्वय् जुइमा, मेमेगु छुं ज्याझ्वः जुइमा वा अथें नयेमाःसां धौ न्याः वनेबलय् झी सकसिनं दकलय् न्हापां लुमनीगु जुजुधौ हे खः । जुजुधौ दत्तले मेमेगु धलिइ झीसं उलि मिखा ब्वइमखु । यदि मेमेगु धौ नं तसकं सात धाःसा जुजुधौ थें च्वं धकाः म्हुतुं च्वाक्क हे धाइ ।

धौया जुजुकथं कयातःगु थ्व जुजुधौ ख्वपय् दयेकीगु खः । उकि ख्वप देय् धौया निंतिं तसकं नांजाः । थ्व हे जुजुधौ आः वयाः संकटय् लाना वनाच्वंगु दु । जुजुधौया छ्यलाबुला तब्या जुजुं वंलिसे थुकिया परम्परागत सवाः, जुजुधौया मौलिकता व गुणस्तर ल्यंकातयेगु नं आः वयाः न्हियान्हिथं चुनौतिपूर्ण जुजुं वनाच्वंगु दु ।

जुजुधौ ख्वपय् दयेकीगु खःसां थ्व ख्वपय देय्या हे जक पहिचानया रुपय् सीमित जुयाः मदु । थ्व नेपाःया हे पहिचान नं खः । ख्वपया थ्व धलिं मल्लकालय् हे ‘जुजुधौ’ या उपमा प्राप्त याःगु खः । थुकिया सवाः अले गुणस्तर नेपालय् जक सीमित मजू, विदेशय् तकं उलि हे लोकंह्वाः । उकिं ख्वप देय् चाःहिउ वइपिं आन्तरिक पर्यटक जक मखसे विदेशी पर्यटकतय्सं तकं जुजुधौया सवाः कयाः वनेगु याइ ।

नेवाः परम्परा वा संस्कृतिकथं जन्मन्हि, भिंगु ज्या, साइतया ज्या, विदेश यात्रा, छुं नं सफलता प्राप्त जुल धाःसा, तःधंगु वा चिधंगु दुर्घटनां पार काःगु अवस्थाय् जुइमा वा सगं बीत जुइमा धौ मदयेकं मगाःगु वस्तु खः । नेवाः समाजय् हरेककथंया लसता ज्या यायेगु इलय् धौ अनिवार्य जू । न्हापा न्हापा जूसा झ्वः भ्वजय् जक धौ छ्यलेगु याना वयाच्वंगु खःसा लिपांगु इलय् पार्टी भ्वय् जुइमा, गुँभ्वय् वा छुं नं लसता भ्वजय् जक मखु, न्हियान्हिथं धौया प्रयोग अप्वया वनाच्वंगु दु ।

जाःगु धौ दयेकेत उच्च गुणस्तरया सा, म्येय्या शुद्ध दुरुया आवश्यक जुइ । मेमेगु दुरुया तुलनाय् चिल्लोपना अप्वः दुगु दुरुयात कराईलय् सिँ च्याकाः तसकं ख्वातुक दुरु दायेकेमाः अले लिपा जक भ्यगतय् तयाः थीथीकथंया मसला तयाः म्वया द्यःने तयाः जुजुधौ तयार याइ । खतुं जुजुधौ दयेकेगु परम्परागत तरिकाय् आः नं छुं हे कथंया भिन्नता मदु ।

जुजुधौया छगू हे जक मौलिकता धइगु थुकिया सवाः व गुणस्तर खः । अले निगूगु धौ भ्यगः । काँठ क्षेत्रय् सा, म्येय् लहीगु व्यवसाय लोप जुया वंगु, कुम्हाःतय्सं चाःया मेमेगु थलबल दयेकूसां भ्यगः दयेकेगु त्वःता हयाच्वंगु व बजारय् प्लाष्टिकया बट्टां थाय् कया हयाच्वंगुलिं यानाः नं जुजुधौया मौलिकता संकटय् लाना वंगु व्यवसायी धापू दु ।

मेखे जुजुधौया नामय् साधारण धौया व्यवसायया कारणं नं जुजुधौया मौलिकता ल्यंकातयेत थाकुया वनाच्वंगु स्थिति दु । बजारय् दंगु धौया माग जुइगु, मेमेगु साधारण धौया तुलनाय् जुजुधौया तयार यायेत आपालं ई काइगु, मेहनत व परिश्रम नापं लगानी नं यक्व यायेमाःगु जक मखसे आवश्यक गुणस्तरया निंतिं दुरुनापं धौ फीत माःगु भ्यगःया अभावया कारणं नं जुजुधौया मौलिकता ल्यंकेत थाकुया वनाच्वंगु जुजुधौ व्यवसायीया धापू दु ।

भ्यगःया तुलनाय् बजारय् प्लाष्टिकया बट्टाया माग आपालं दुगु व व्यवसायीतय्त नं अःपुक व दंक लाइगु जूगुलिं नं भ्यगतय् फिनातःगु जुजुधौया मौलिकता व थुकिया म्हसीका तना वनीगु सम्भावना अप्वया वनाच्वंगु खः । जुजुधौया छगू मुख्य विशेषता धइगु चक्कुं कुचा कुचा यानाः ताये जिउ । भ्यतय् फिनातःगु जुजुधौ भ्वपुइकूसां मवाइगु मवाइगु मेगु विशेषता खत ।

थुकथंया विशेषतां जाःगु धौ दयेकेत उच्च गुणस्तरया सा, म्येय्या शुद्ध दुरुया आवश्यक जुइ । मेमेगु दुरुया तुलनाय् चिल्लोपना अप्वः दुगु दुरुयात कराईलय् सिँ च्याकाः तसकं ख्वातुक दुरु दायेकेमाः अले लिपा जक भ्यगतय् तयाः थीथीकथंया मसला तयाः म्वया द्यःने तयाः जुजुधौ तयार याइ । खतुं जुजुधौ दयेकेगु परम्परागत तरिकाय् आः नं छुं हे कथंया भिन्नता मदु ।

न्हापा सिँ च्याकीगु थासय् थौंकन्हय् धाःसा ग्यास भुतूछ्यलेगु याना वयाच्वंगु दु । सिँ च्याकेबलय् कुँ वयाः वातावरणलिसें स्वास्थ्यय् नं प्रतिकूल लिच्वः लाइगु व सिँया पलेसा ग्यासय् यायेबलय् सरल व सहज जुइगुलिं नं ग्यास भुतूया प्रयोग अप्वया वंगु जुजुधौ व्यवसायी संघ ख्वपया अध्यक्ष कृष्णगोपाल संैजूं कनादिल ।

थौंकन्हय् आधुनिक प्रविधिया नामय् धौयात फ्रिजय् तयाः फीगु (जमे यायेगु) याना वयाच्वंगु दु । थुकिं यानाः नं जुजुधौया मौलिकताय् म्होति वयाच्वंगु अध्यक्ष सैंजूं कनादिल । वय्कःकथं जुजुधौया मौलिकता ल्यंकातयेत संघं ट्रेडमार्क लागू यायेगु तयारी याःगु दु । ‘जुजुधौया पहिचान कायम यायेत संघपाखें ट्रेडमार्क लगाू यानाः न्ह्याः वनेगु योजना न्ह्यःने हयागु दु ।

थुकिं यानाः कन्हय् छुं नं डेरी लगायत मेमेपिंसं जुजुधौया नामय् मेमेगु धौया उत्पादन व व्यापार याये मजीक यानाः कानुनी प्रक्रिया न्ह्याके धुंगु दु’, वय्कलं धयादिल, ‘सुनानं जुजुधौ व्यवसाय संचालन यायेमाल धाःसा संघय् आवद्ध यानाः न्ह्यःने यंकेगु जुइ ।’वय्कलं धयादी, ‘मेमेगु व्यावसायिक धलिइ दुरुया दक्वं चिल्लो लिकयाः पाउडर दुरु ल्वाकछ्यानाः हां (बाफं) जक क्वाकाः धौ उत्पादन यायेगु याइ, तर जुजुधौ अथे जुइमखु ।

जुजुधौया निंतिं दुरुइ म्होतिं नं ५ प्रतिशत चिल्लो पदार्थ दयेमाः ।’डेरी (दुग्ध संस्था)तय्सं यानाः जुजुधौया निंतिं दुरु संकलन यायेत तकं समस्या वःगु वय्कःया धापू दु । ‘डेरीयात म्हो जक चिल्लो दुसां जिउ, तर जुजु धौया निंतिं ‘फ्याट’ दुगु दुरु माःगुलिं किसानं नं दुरुइ लः ल्वाकछ्यानाः जिमित स्वयां नं डेरीयात हे दुरु मीत स्वइ’, वय्कलं धयादिल, ‘थुकिं यानाः जिमिसं पिने जिल्लां थिकेक ध्यबा पुलाः दुरु संकलन यायेमाः ।

काँठ क्षेत्रं वइगु दुरु दक्वं डेरीं म्हयेवं जिपिं थेंज्याःपिं व्यवसायीतय्सं समस्या फयेमालाच्वंगु दु । आः थःपिंसं उच्च गुणस्तरया दुरुया निंतिं चितवन, काभ्रे, इलाम, बुटवल लगायतया थासं दुरु हयेगु यानाच्वनागु दु ।’थौंकन्हय् बजारय् न्ह्यागु थासय् नं चालाच्वंगु डेरीं आधुनिक प्रविधि छ्यलाः दंक व अःपुक धौ तयार यानाः जुजुधौया तुलनाय् तसकं दंगु भावं धौ मीगु याना वयाच्वंगुलिं प्रतिस्पर्धाया कारणं नं जुजुधौया मौलिक पहिचामन ल्यंकेत संघर्ष यायेमालाच्वंगु वय्कःया धापू दु ।

जुजुधौया विज्ञापन यानाः सामान्य धौ मीगु यानाच्वंगुलिं नं जुजुधौया महिमा म्हो जुया वनाच्वंगु १५ दँ न्ह्यवंनिसें धौ व्यवसाय याना वयाच्वनादीम्ह ख्वप नगरपालिका इताछेँस्थित ख्वप जुजुधौ पसःया सीतासन धौभडेलं धयादिल ।

सा, म्येँय्या शुद्ध दुरुया अभाव लिसें पाउडर दुरुइ क्रिम ल्वाकछ्यानाः दुरुयात ख्वातुक व चिल्लो दयेकेगु प्रवृत्ति दुगु जुजुधौ व्यवसायी राधेश्याम कर्माचार्यं कनादिल । दुरुइ अनेकथंया मिसावट याइगुलिं उकिया वास्तविक सवाः व गुणस्तरलिसें जुजुधौया मौलिकता तना वनीगु जकं खःला धइगु चिउताः अप्वया वनाच्वंगु जुजुधौ व्यवसायीतय् धापू दु ।

सम्बन्धित बुखँ

LEAVE YOUR COMMENTS