हिमाल गःवनीपिं लिहां वयेबलय् नं न्यासि हे वयेमाःगु अनिवार्य व्यवस्था लागु

येँ – हिमाल आरोहणय् वनीपिंसं आवंनिसें आधार शिविरं निसें च्वकाय् तक वनेबलय् व अनं लिहां वयेबलं पूवंक लँय् न्यासि वनाः हे यायेमाःगु बाध्यकारी व्यवस्था लागू याःगु दु । अथेहे हिमाल गः वनेबलय् छम्ह नेपाली गाइड नं अनिवार्य ज्वना वनेमाःगु व्यवस्था याःगु दु ।
हिमाल गःवनीपिंसं च्वकाये थ्यनेधुंकाः हेलिकप्टरं लिहां वयेगु यानाच्वंगु व विदेशी आरोहणकर्तात गाइड तकं मज्वँसें हिमाल गः वनाच्वंगुलिं सरकारं नियमावली हे संशोधन यानाः थ्व न्हूगु व्यवस्था याःगु खः ।

संस्कृति, पर्यटत व नागरिक उड्डयन मन्त्रालयं न्याक्वःखुसी संशोधन यानाः पर्वतारोहण सम्बन्धी नियमावली २०७४ लागू याःगु खः ।
नियमावली संशोधन यानाः वये–वने यायेबलय् न्यासि हे वनेमाःगु अनिवार्य व्यवस्था यासें आपतकालिन उद्धारया ज्याय् धाःसा हेलिकप्टर, हवाइजहाज, बेलुन छ्यलेत पंगः मजुइगु कार्यविधिइ न्ह्यथनातःगु दु ।अथेहे पर्वतारोहण सम्बन्धी उपकरण व सामग्री पर्वतारोह व उगु दललिसे वनेत अनुमति कयातःम्ह भरियां जक ज्वना वनेदइगु व्यवस्था नं याःगु दु ।

अथेहे न्हूगु नियमावली कथं पर्वतारोहणय् वनीम्ह सम्पर्क अधिकृतया निंतिं १६ लाख बराबरया बीमा याःगु दुसा सरकार, पर्वतीय गाइड, च्वय् थहां वनीपिं भरियाया निंतिं नं १५–१५ लाखया दरं बीमा अप्वयेकूगु दुसा आधार शिविर तक वनीपिं भरियाया निंतिं ८ लाखया बीमा व्यवस्था याःगु दु ।थ्वयां न्ह्यः सम्पर्क अधिकृतया ६ लाख, सरकार व पर्वतीय गाइडया ५ लाख, च्वय् थहां वनीपिं भरियाया ४ लाख व आधार शिविर तक वनीपिं भरियाया ३ लाख जक बीमा व्यवस्था यानातःगु खः ।नियमावली गुलि उचाइतक वनेगु खः व स्वयां बीमाया व्यवस्था याःगु खः । अथेहे न्हूगु नियमावलीं हिमाल गःवनीपिंसं १५ गः तक वाकीतकी यंकेदइगु व्यवस्था नं याःगु दु ।

थ्वयां न्ह्यः झिंनिगः वाकिटकी जक यंकेदइगु व्यवस्था जुयाच्वंगु खः । १५ गः वाकिटकीया लिसें न्हापा हे व्यवस्था जुयाच्वं कथं लित यंकेगु सर्तय् निगः स्याटेलाइट फोन, आधार शिविरं निसें येँ तक खँ ल्हायेफइगु क्षमता दुगु निगः वायरलेस, आधार शिविर निसें दकलय् सतिगु प्रहरी चौकी वा दूरसंचार साधन दुगु थाय् तक खँ ल्हायेफइगु निगः वायरलेस छ्यलेफइ । न्हूगु नियमावलीइ नं ६ हजार मिटर तकया हिमाल गइबलय् २० किलो, ६ निसें ७ हजार मिटर च्वय् वनेपिंत १७ किलो, ७ हजार निसें ८ हजार मिटर च्वय् वनीपिंत १४ किलो व ८ हजार स्वयां च्वये वनीपिंत १२ किलो जक भारि क्वबीकेदइगु व्यवस्था कायम हे यानातःगु दु ।

नेपाल राष्ट्रिय पर्वतारोहण पथप्रदर्शक संघया महासचिव तुलसिंह गुरुङं गाइड व भरियातय् बीमा रकम अप्वयेकूगु सकारात्मक व ऐतिहासिक उपलब्धि ज ूगु खँ धयादीगु दु । नेपालय् इन्टरनेशनल माउन्टेन गाइड एशोसियसनं मान्यता कयातःपिं मुक्कं ६७ म्ह जक गाइड दु । हिमाल गयेकीपिं गाइड उत्पादन यायेत यक्व खर्च यानाः तसकं जोखिमपूर्वक ज्या यायेमाः । उकिं नेपालय् दँय् न्याम्ह जक हिमाल गयेकीपिं गाइड थप जुयाच्वंगु दु ।