ओमबहाःया कुलपुत्रपिनि प्रव्रज्याभिषेक

येँ(नेपालभाषा टाइम्स)- मञ्जुश्रीनक महाविहार ओमबहाःया शाक्य कुलपुत्रपिनि मंकाः प्रव्रज्याभिषेक याःगु दु । वंगु शनिवाःकुन्हु मञ्जुश्रीनक महाविहार संरक्षण सुधार संघया ग्वसालय् नीप्यम्ह शाक्य कुलपुत्रपिनि मंकाः प्रव्रज्याभिषेक याःगु खः ।

प्रव्रज्याभिषेक लिपा सकसितं धाःबाजंसहितं हनुमानध्वाखा लाय्कुलिइ यंकूगु खः । वन्दे छुइगु नं धाइगु प्रव्रज्याभिषेकय् भीमरत्न वज्राचार्य मूलाचार्य जुयाः पुजा यानाबिज्याःगु खः ।

प्रव्रज्याभिषेकया झ्वलय् देजला चाःहिकेकथं मस्तय्त छत्रं कुइकाः हःगु खः । प्रव्रज्याभिषेकया झ्वलय् ग्वय्दां तयेगु, छ्वय्ला भू यायेगु, दुस्वः पुजा यायेगु, देजला वनेगु भिक्षाटन वनेगु, चीवर क्वकायेगु, मत कायेगु आदि ज्याझ्वः याःगु खः ।