येँ मनपायात प्रदेश सरकारं ग्वाहालि याइगु

येँ- प्रदेश नं. ३ सरकारं येँ महानगरपालिकाया विकासय् ग्वाहालि याइगु जूगु दु । प्रदेश नं. ३ सरकारं येँ महानगरपालिका दुने अव्यवस्थित रुपं दयाच्वंगु बसोबासयात व्यवस्थित यायेगु आश्वासन बिउगु खः । प्रदेश नं. ३या सरकार व येँ महानगरपालिका दथुइ जूगु अन्तक्र्रियाया इलय् प्रदेश नं. ३ या मुख्यमन्त्री डोरमणि पौडेलं येँ मनपाया विकासया निंतिं प्रदेश सरकारं आवश्यक ग्वाहालि यायेगु खँ धयादीगु प्रदेशसभा सदस्य दीपक निरौलां जानकारी बियादीगु दु ।

वइगु आर्थिक दँय् येँ महानगरपालिकाया विकासय् सहकार्य यायेगु सम्बन्धय् प्रदेश नं. ३ या सरकारलिसे जूगु अन्तक्र्रियाया इलय् प्रदेश सरकारं येँ मनपाया सरसफाइ निंतिं ब्रुमर व आपतकालीन अवस्थाया निंतिं दमकल व एम्बुलेन्स लगायतया ग्वाहालि उपलब्ध याकेगु आश्वासन बिउगु प्रदेशसभा सदस्य निरौलां कनादिल ।

मुख्यमन्त्री चिचिधिंगु व थ्वःचा थ्वःचा यानाः जुइगु योजनां देय्या विकास व परिवर्तन वइमखु धइगु खँय् विश्वस्त जुयादी उकिं ततःधंगु व मेघा प्रोजेक्टपाखें येँ देय्यात व्यवस्थित व सुन्दर सहर दयेकेगु वय्कःया योजना दुगु निरौलां कनादिल ।

अन्तक्र्रियाय् मुख्यमन्त्री पौडेललिसें येँया प्रतिनिधिसभा सदस्य कृष्ण राई, येँ मनपाया प्रमुख विद्यासुन्दर शाक्य, महानगर दुनेया प्रदेशसभा सदस्यपिनिगु उपस्थिति दुगु खः ।

सम्बन्धित बुखँ

LEAVE YOUR COMMENTS