बालेनया सल्लाहकारपाखें राजीनामा

येँ (नेपालभाषा टाइम्स)- येँ महानगरपालिकाया मेयर बालेन साहया शिक्षा सल्लाहकार रेशु अर्यालं म्हिगः राजीनामा बियादीगु दु । मेयर बालेन साहया गतिविधि प्रति असन्तुष्टि प्वंकुसें सल्लाहकार अर्यालं पदं राजीनामा बियादीगु दु । वय्कलं सामाजिक सञ्जालय् छगू स्टाटस च्वसें राजीनामा बियादीगु खः ।

येँया सामुदायिक स्कुलय् जूगु शिक्षा सुधार ज्याझ्वलय् अर्यालं मू भूमिका म्हितादीगु खः । वंगु दँया भदौ महिनाय् अर्यालयात शिक्षा सल्लाहकार नियुक्त याःगु खः ।
शिक्षाविद् अर्यालं मेयर साहं यानाच्वंगु थीथी ज्याखँत थःगु मूल्य मान्यता अःखः जूगु व उगु निर्णय थःगु छेँलिसे नं स्वाःगुलिं स्वार्थया द्वन्द्व जूगुलिं राजीनामा बीमाःगु खँ नं धयादीगु दु । मेयर साहं येँय् हिन्दी फिल्मय् प्रतिबन्ध तयेवं नेपाल चलचित्र संघं मनपा विरुद्ध मुद्दा तःगु दु । मय्जु अर्यालया छेँजःपिं हल व्यवसायय् नं संलग्न दु ।

चीधंगु अर्थतन्त्र व व्यवसाय याइपिं मनूतय्त जबर्जस्ती नगर प्रहरी छ्यलाः ज्वंगु विषयसं थम्हं पटक–पटक सः तयां नं सुनुवाइ मजूगु खँ धयादीगु दु । उकथं हे वय्कलं शिक्षाय् नैतिकताया खँ वइगु जूगुलिं ठेला चीकेगु झ्वलय् लाकमं प्यंकूगु भिडियों नैतिक न्ह्यसः ब्वलंकूगु धासें छुं नं ज्या बन्द याकेगु खःसा प्रक्रिया पूवंकाः व्यवसायीयात सुचं बियाः यायेमाःगु खःसां मेयर साहं फेसबुकय् स्टाटस च्वयाः यानाच्वंगु खँय् कुंखिनादीगु दु ।

उकथं हे वय्कलं मेयर साह भीडया लिउलिउ ब्वाँय् जुयाच्वंगु धासें मेयर साहयाके लोकतान्त्रिक अभ्यास मदुगु द्वपं नं बियादीगु दु ।

मेयर साह छम्ह ल्याय्म्हम्ह व उर्जाशील मनू जूगुलिं वय्कलं छुं याइगु जुइ धकाः थम्हं नं ग्वाहालि याये फइ ला धकाः सल्लाहकार जुयागु खःसां वय्कः ला थः यत्थे, सुनां धाःगु खँ तकं मन्यँसे अराजक ढंगं सना जुइम्ह मनू जकं लानाच्वन, उकिं वय्कःलिसे ज्या याये फइ मखु धकाः राजीनामा बियागु खँ नं वय्कलं कनादीगु दु ।
अर्याल कोलम्बिया विश्व विद्यालयया टिर्स कलेजं शैक्षिक सुधारया नितिं नेतृत्व विषयय् स्नानकोत्तर यानादीगु दु ।

बालेनयात कारण देखाऊ ः
थ्वहे झ्वलय् भृकुटीमण्डपया शैक्षिक मेला बन्द याके मते धकाः यलया उच्च अदालतं येँ मनपायात अन्तरिम आदेश बिउगु दु । उच्च अदालतया न्यायाधीशपिं टेकप्रसाद ढुंगाना व रमेश ढकालया मंकाः इजलाशं संघीय सरकारं अनुमति बीधुंकूगुलिं स्थानीय तहयाके अनुमति कायेम्वाः धासें मेला चले याकेत आदेश बिउगु खः ।