ओली नं फेक फेसबुकया शिकार

येँ (नेपालभाषा टाइम्स)- सामाजिक सञ्जालय् अतिकं सक्रिय धयातःम्ह नेकपा (एमाले) या अध्यक्ष केपी ओली हानं छक्वः नकली आईडीया शिकार जुयादीगु दु । झापाय् पहिचानवादीतय्सं वय्कःया गाडीइ अप्पां कयेकूगु खँयात हिमानी शाहया नामं चायेकातःगु छगू फेसबुक एकाउन्टं ‘ओलीयात जनतां अप्पां कयेकल’ धकाः च्वयाहःगु जुयाच्वन । ओलीं उकियात कयाः छक्वलं आलोचना यासें राजतन्त्रया काय–भौयात न्ह्यःने तयाः फुरफुर याये मते धकाः ख्याच्वः बियादीगु खः ।

तर वय्कलं गुगु फेसबुक टिप्पणीयात कयाः हिमानी शाहया आलोचना यानादीगु खः, व फेसबुक एकाउन्ट हे शाहयागु मखु जुयाच्वन । म्हिगः पुलांम्ह जुजु ज्ञानेन्द्र शाहया सचिवालयं छगू विज्ञप्ति पिकासें हिमानी शाहं छुं नं फेसबुक चले मयाइगु खँ स्पष्ट याःगु दु ।

थुकिं यानाः ओलीयात हानं छक्वः ‘हावादारी’ साबित याना बिउगु खँ धयाहःगु दु । थ्व स्वयां न्ह्यः नं ओलीं थथे हे गलत सुचंया आधारय् आपालं मनूतय् आलोचना यानादीधुंकूगु दु । थुकिं यानाः ओलीं आधार काइगु आपालं सुचं गलत जुइगु व उकिया आधिकारिकता तकं मदइगु खँ पुष्टि जूगु खँ धयाहःगु दु ।

ओलीं पुलांम्ह जुजु खलःयात ब्वः बियाः न्ववाःगु खँया समाचारय् नं आपाःसिनं ओलीया हे कडा आलोचना यानाः प्रतिक्रिया च्वयाहःगु खः ।