स्वयेबहपिं कासामि

डिएगो कोस्टा, फरवार्ड, स्पेन
एथलेटिको मेड्रिडया फरवार्ड कोस्टा ब्राजिलियन नागरिक खःसां लिपा स्पेनया निंतिं म्हितावःम्ह खः । कोस्टां थ्वयां न्ह्यव ब्राजिलया निंतिं नं निगू मैत्रीपूर्ण कासा म्हितूगु खः । सन् २०१४ य् ब्राजिलं विश्वकपया ग्वसाः ग्वःगु इलय् हे कोस्टां स्पेनपाखें विश्वकप म्हितूगु खः । थ्वहे कारणं व उबलय् चर्चाय् नं वल, लिसें ब्राजिलियनत कोस्टा खनाः तसकं तंचाःगु नं खः ।

कोस्टां स्पेनया निंतिं आःतक नीनिगू कासा म्हितेधुंकूगु दुसा झिंछगू गोल यायेधुंकूगु दु । थुगुसी विश्वकपया न्हापांगु कासाय् पोर्चुगलविरुद्ध निगू गोल नं यायेधुंकूगु दु ।

लुइस स्वारेज, फरवार्ड, उरुग्वे
बार्सिलोनाया लुइस स्वारेजं थःगु देय्या निंतिं सछिगू कासा म्हिताः ५१ गोल यायेधुंकूगु दु । स्वारेजं थःगु सछिगूगु कासा विश्वकपया वंगु कासाय् जक पूवंकूगु खः । अथेहे उरुग्वेया निंतिं ५० गोल पूवंकूम्ह स्वारेज न्हापांम्ह कासामि नं खः । सन् २०११ य् कोपा अमेरिका त्याकूबलय् स्वारेज याकःचां हे प्यंगू गोल नं याःगु खः । स्वारेजया थ्व स्वक्वःगु विश्वकप खः ।

सन् २०१० व २०१४ य् नं विश्वकप म्हितूम्ह स्वारेज उबलय् विवादय् नं वःगु खः । सन् २०१० य् प्यंगूगु थासय् लाःगु उरुग्वेया स्ट्राइकर स्वारेजं ल्हातं बल पनाबिउगु कारणं चर्चाय् वःगु खःसा सन् २०१४ य् इटलीया डिफेन्डरया ब्वहलय् वांन्याना बिउगुलिं चर्चाय् वःगु खः । उबलय् स्वारेजयात ९ महिना तक प्रतिबन्ध नं तयाबिउगु खः ।

सम्बन्धित बुखँ

LEAVE YOUR COMMENTS