इंग्ल्यान्ड व डेनमार्क युरो कपया सेमिफाइनलय्

येँ – युरो कप २०२०या क्वार्टरफाइनलय् युक्रेन विरुद्ध न्ह्यथनेबहःगु विजय चूलाकुसें इंग्ल्यान्ड सेमिफाइलय् दुहां वंगु दुसा डेनमार्क नं सेमिफाइनलय् थाय् दयेकूगु दु ।

शनिवाः चान्हय् जूगु कासाय् इंग्ल्यान्डं युक्रेनयात ४–० गोलं बुकूगु खःसा थ्वयां न्ह्यः जूगु कासाय् डेनमार्कं चेक गणतन्त्रयात २–१ गोलं बुकाः अन्तिम प्यंगू टिमय् थःपिंत दुथ्याकूगु खः ।

इंग्ल्यान्डया विजयया निंतिं कप्तान ह्यारि केनं निगू गोल यातसा ह्यारि मेग्वाएर व जोर्डन इन्डरसनं छगू छगू गोल याःगु खः । ह्यारि केनं न्हापांगु हाफया प्यंगूगु मिनेटय् व लिपांगु हाफया न्यागू मिनेट दुने हे गोल याःगु खः । कासा सुरु जूगु प्यंगूगु मिनेटय् रहिम स्ट्रलिङ्गं बिउगु पासय् केनं याउँक गोल याःगु खःसा न्हापांगु हाफय् थ्व बाहेक मेगु गोल जुइमफुत, तर लिपांगु हाफ सुरु जूगु १ मिनेटय् हे ह्यारि मेग्वाएरं गोल यासें इंग्ल्यान्डयात निगू गोलया अग्रता बिउगु खः ।

थ्वयां प्यंगू मिनेट लिपा हे केनं थप छगू गोल याःगु खः । थ्व गोल लिसें केनया थुगुसीया युरो कपय् स्वंगू गोल थ्यंगु दु । कासाया ६३ औं मिनेटय् जोर्डनं हेन्डरसनं कर्नरय् वःगु बलयात हेड यासें थप छगू गोल याःगु खः । हेन्डरसनया थ्व न्हापांगु अन्तर्राष्ट्रिय गोल खः । इंग्ल्यान्ड १९९६ लिपा न्हापांखुसी युरो कपया सेमिफाइलनय् थ्यंगु खः ।

मेखे थ्वयां न्ह्यः जूगु कासाय् चेकयात २–१ गोलं बुकेगु झ्वलय् डेनमार्कया निंतिं डेलाने व क्यास्पर डोल्बर्गं छगू छगू गोल यात । कासाया न्यागूगु मिनेटय् हे स्ट्रेगर लार्सनया पासय् डेलानें गोल यासें डेनमार्कयात अग्रता बिउगु खःसा कासाया ४२ औं मिनेटय् जोकिम माहिलेया सुन्दर पासय् डोल्वर्गं गोल याःगु खः ।

निगूगु हाफ सुरु जुइवं पिटर सेकं गोल यासें चेकयात कासाय् लित हयेगु कुतः याःगु खःसां अन्तिम इलय् तक थप गोल यायेमफयेवं निराश जुयाः लिहां वनेमाःगु दु । सेकया थ्व गोल धाःसा थुगुसीया युरोय् वयागु व्यक्तिगत न्यागूगु गोल खः । पोर्चुगलया रोनाल्डों नं थुगुसी युरो कपय् न्यागू गोल याःगु दु । आःतकया निंतिं थुगुसी दकलय् अप्वः गोल याःपिं थुपिं हे निम्ह जूगु दु ।
आः सेमिफाइनलय् इंग्ल्यान्डं डेनमार्क लिसे म्हितीसा स्पेनं इटलीलिसे म्हिती ।

सम्बन्धित बुखँ

LEAVE YOUR COMMENTS