ब्राजिल नं निराश, स्वीटजरल्यान्ड लिसे बराबरी

एजेन्सी/ विश्वकपया दावेदार टिमत निराश जुइमाःगु झ्वलय् ब्राजिल नं थःगु न्हापांगु कासाय् निराश जुइमाःगु दु । थुगु विश्वकपया दावेदार व डिफेन्डिङ च्याम्पियने जर्मनी मेक्सिकाेपाखें १-० गाेलं निरास जूगु स्वघाै लिपा हे ब्राजिलं स्वीट्जरल्याण्ड लिसे १-१ गाेलया बराबरीइ चित्त बुझे यायेमाःगु दु ।

छन्हु न्ह्यव तिनी मेगु दावेदार अर्जेन्टिनां थुगुसी तिनि विश्वकप म्हितःवःगु अाइसल्याण्डलिसे बराबरीइ चित्त बुझे याःगु खः ।

ब्राजिलं न्हापांगु हाफया २० मिनेट दुने हे गाेल यासें प्रभावशाली शुरुवात याःगु खःसां स्वीट्जरल्यान्डया जुझारुपनया न्ह्यने छुंं लगे मजुल । निगूगु हाफ सुरु जूगु ५ मिनेट लिपा हे स्वीटजरल्यनन्डया निति जुबेरं गाेल यासें ब्राजिलयात निराश यानाबिउगु खः ।
जुबेरं ५० अाैं मिनेटय् कर्नर बलय् हेड यासें गाेल याःगु खः । ब्राजिलया नितिंं काेन्टिन्हाें कासाया २० अाैं मिनेटय् गाेल याःगु खः ।